Nepa Rastriya Party celebrating fourth of its establishment: The Newah extends greetings on the occasion

Yen (Kathmandu), Nepal Mandala – Nepal’s only party “dedicated” for the cause of Newar population in and outside Nepal Mandala is celebrating its fourth year of establishment as a party from 15 to 17 of this month in Kathmandu city and its suburb Lalitpur. The Newah family extend its heartiest congratulations to NRP and its members with all success in its endeavours in guaranteeing the rights of Newar population and the native land of Nepal Mandala. More in Nepal Bhasa.

नेपा: पार्टिया बुन्हिया लसताय् थीथी ज्याझ्व:। झी द नेवा:या पाखेँ भिन्तुना!

ने.सं. ११३१ पोहेँला १२ (आइतवा:)
येँ, नेपाल मण्डल – थनी स्वदँ न्ह्यव: पलिस्था जुगु नेपा: राष्ट्रीय पार्टिया बुन्हिया लसताय् थीथी ज्याझ्व: न्ह्याकीगु बुखँ दु। झीत: थ्यंकव:गु म्हीगया मेलकथँ नेरापाया “बुन्हि” वा “पलिस्था न्हि” सिबेनँ “स्थापना दिवस” या लसताय् थीथी ज्याझ्व: न्ह्याकीगु खँ न्यनेदु। व मेलकथँ, “पार्टिया स्थापना दिवसया लसताय ११३१ पोहेलागा १-३ (१५-१७ जनवरी) स्वन्हुयंकं थी थी ज्याझ्व:याना त:जिक हनेगु ग्वसा दुगुजुल।“ धया:त:गुदुसा, ज्याझ्व:या धल: थथे केनात:गु दु।
“१) तुच्चा ज्याझ्व: – ने.सं. ११३१ पोहेलागा १ (२० जनवरी) विहिवा; थाय- महालक्ष्मी स्थान, थानकोट गाविस भवन, न्हिनसिया १:०० ता: निसें। २) थीथी राजनैतिक पार्टीया शिर्षस्थ नेतातयगु सहभागिताय सभा नापं तुच्चा ज्याझ्व: – ने.सं. ११३१ पोहेलागा २ (२१ जनवरी) शुक्रवा; थाय- तक्ती अजिमा (टंकेश्वर), कामपा वडा नं १३, न्हिनसिया १:०० ता: निसें। ३) स्थापना दिवसया ज्याझ्व: क्वचा:गु घोषणा नापं तुच्चा ज्याझ्व: – ने.सं. ११३१ पोहेलागा ३ (२२ जनवरी) शनिवा; थाय- त:बहा: (मच्छिन्द्र बहा:), यल, न्हिनसिया १:०० ता: निसें।” व हसनाय् जनवरि १५-१७ स्वन्हुयंक धयात:गु थासय् हानँ जनवरि २०, २१ व २२ या ज्याझ्व:या धल:या अर्थ थुइकेत: नेरापाया ज्याकुथि स्वापू तया न्यनेगु बेस जुयेफु। स्वापू:- १) नरेशवीर शाक्य, न्वकू नापं संगठन विभाग प्रमुख – ९८५१० ३०३७६ ([email protected])। २. सुरेश प्रधान, दांभरी – ९८५१० ३९५७७ ([email protected])

अले “मुक्कं नेवा: तयगु च्यूता तइगु पार्टी, नेपा: राष्ट्रिय पार्टी”; न्हूगु निर्माणाधिन संविधानय अग्राधिकार दुगु जातीय प्रदेश कथं नेवा: प्रदेशया निश्चित्तताया निंतिं निरन्तर न्ह्यानाच्वंगु” खँ न्ह्यथँसे “थुकथंया ज्याझ्वया निंतिं ग्वाहालि जुइ कथं” म्हतिँ, संस्था, ज्याकू” इत्यादी पाखें “उल्लेख्य आर्थिक ग्वाहालि” व “नेपा: राष्ट्रिय पार्टीया थीथी ज्याझ्वलय” ब्वति कायेत: इनाप यानात:गु दु।

झी द नेवा:, हलिमय् छगुहे जक नेवा: ब्लग सुरुयानानँ थउँ स्वदँ फुना पेदँ क्यंगु दु। ब्लगया दकले न्हापाँगु कमेन्टहे नेपा: राष्ट्रीय पार्टि पलिस्था जूगु बुखँ प्रचारयानागु ख:सा हलिमय् दकले न्हापाँगु अनलाइनया भिन्तुनाया हसनानँ झीगु द नेवा:नँ पिकागु ख:। व जक मखु नेपा: राष्ट्रीय पार्टिया तातुना धात्थँहे सुथाँ लायेमा धका भीँतुनिगु परिवार ख: झीगु थ्व द नेवा:। उकेँ नेपा: राष्ट्रीय पार्टिया पेदँ क्यंगु लसताय् झीगु पाखेँ दुनुगलँ निसेँ भीँतुना च्वना।

अले झीत: थ्यंगु नेरापाया हसना “मुक्कं नेवा: तयगु च्यूता तइगु पार्टी, नेपा: राष्ट्रिय पार्टी”; न्हूगु निर्माणाधिन संविधानय अग्राधिकार दुगु जातीय प्रदेश कथं नेवा: प्रदेशया निश्चित्तताया निंतिं निरन्तर न्ह्यानाच्वंगु” पार्टि धया:त:थेँ “धाय् अ:पु धर:ग्वारा त:पु” खँयाखँ जक जुया नेवा:तेत झं:ग लाइगु मेमेगु पार्टितथेँ नेवा:तेगु आसयात निरास याना थ:म्हँ म्हूगु गाले थ:नँ कतपिन्त:नँ क्वफाइगु ज्या मजूसेँ धात्थेँ हे नेवा:तेगु विश्वास त्याका काय् फूगु नेवा:तेगु राजनैतिक संस्था जुये फयेमा धका भीँतुना च्वना।

अनँ, नेरापाँ “मुक्कँ नेवा:तेगु छुखँय् च्यूता” तया च्वनले धैगु खँ गुलिसिनँ स्यू झीसँ सीके मफु। उकीया हुनिकथँ, नेरापाँ नेपाल देसया राष्ट्रीय पार्टिकथँ गुलितक्क राष्ट्रीय सञ्चार माध्यया मन त्याका कायेफत वा नेरापा या प्रचार प्रसार गुलि याके फत धैगु खँय् हे आपासिया दोमन जुइफुनि। छगु निगु नेवा: सञ्चार माध्यँ सिबे खसतेगु सञ्चार माध्यँ गुलि नेरापाया बुखँ प्रचार याना ब्यूगु खँ, आपासिनँ मस्यूनि। (लुमंके बहजु, खस अखबारया दकले अप्व अखबार न्याइपिँ ग्राहकतनँ, विज्ञापन दातातनँ नेवा:त हे ख:)

हानँ नेरापाया दुज:हे गुलिदु सीके अ:पुगु खँ मखुनि। ख:जा संविधान सभाया चुनाव जूबले ३०,००० (स्वीद्व:) मनूतेसँ भोट कुर्कूगु ख:सा, थ्व स्वदँया दुने ग्व:द्व: दुज:त नेरापाय् दुहाँवल धैगुला मेपिनि सिबे नेवा:तय् सीके य:गु खँ नेरापाया नाय: कजिपिसँ थुइका का:गु ख:ला सी मदु। नेवा:तेगु दकले त:धंगु च्यूताया दथुइ, झीगु माँभास, नेपाल भास, नेपाल लिपि, संस्कृति, आर्थिक प्रगतिया नापँ ला व लुसिथेँ स्वा:गु झीगु माँदेस नेपाल मण्डलया लागा यात झीसँ कितान याना कायमफुसा झीगु अधिकार गन सुरक्षित जुइ? धैगु विषय बिचा: यायेबले उकुन्हुतिनि नेरापाँ पिकाल धा:गु नेवा: प्रदेसया नक्साँ झीगु लागा झीगु अग्राधिकारया सुरक्षाया छूँहे ग्यारान्टि खने मदु। छगु जिम्मेवारि राजनैतिक पार्टिँ पिकाइगु नक्सा खसत खनाँ ग्यानाँ दयेकूगु नक्सा मखुसे, नेवा: सकसितँ स्वीकार जुइगु दकले “नेवा: लागा धैगु नेपाल मण्डल धैगु सत्य” यात गौरवतय फूगु नक्सा जूसा जक नेरापा सकसितँ स्वीकार जुइ। अथे मखुसा सन् १९९० निसेँ पिहाँव:गु अबुयागु सम्पती म्हितीगु (neo-patrimonial) न्हूँ पार्टित सिबे छूँ पाइमखु। थुज्व:गु पार्टि आपासित: स्वीकार जुइमखु।

नेरापा निओ-पाट्रिमोनियल् मखु धका ला:सा, थुगुसी न्हूँगु कार्य समिति ल्यया क्येना बीगु ख:ला सीके बाकि हे दनि। थ्व च्यूतानापँ, नेरापा, नेवा:तेसँ भलसा कायफूगु, नेवा:तेसँ भलसा बी फूगु पार्टि जुये फयेमा धका झी द नेवा: परिवारँ हानँ भीँतुना च्वना।
नापँ, झीगु ब्लग स्वयादीपिँ ग्वम्हेसिनँ नेरापाया बारे स्यू? गुलि भलसा कायेफूगु, बियेबह:गु पार्टिकथँ कयादिया, NRP – YES or NO जक जूसाँ कमेन्ट याना दियेत: इनाप याना च्वना। छिगु कमेन्ट थनक्वसँया ध्व:क्वसँ च्वया दिसँ।