𑐩𑐵𑑃 𑐨𑐵𑐳
𑐗𑐷𑐐𑐸 𑐨𑐵𑐫𑑂 𑐣𑐾𑐰𑐵𑑅 𑐨𑐵𑐫𑑂
𑐩𑐵𑐩𑑄 𑐳𑑂𑐫𑐾𑐣𑐵 𑐧𑑂𑐫𑐹𑐐𑐸 𑐩𑐵𑑃𑐨𑐵𑐫𑑂
𑐠𑐸𑐎𑐷𑐫𑐵𑐟 𑐩𑑂𑐰𑐵𑐎𑐵𑐟𑐾𑐐𑐸 𑐴𑐾 𑐖𑐎
𑐩𑑂𑐰𑐵𑐐𑐸 𑐖𑐸𑐂 𑐠𑐣 𑐗𑐷𑐥𑐶𑑃𑐣𑑄 𑐢𑐵𑐟𑑂𑐠𑐾𑑃
𑐠𑑅𑐐𑐸 𑐨𑐵𑐫𑑂 𑐴𑐾 𑐩𑑂𑐰𑐵𑐎𑐵𑐟𑐾 𑐩𑐦𑐸𑐳𑐵
𑐠𑑅𑐴𑑂𑐩𑑃 𑐠𑑅𑐟 𑐴𑐾 𑐟𑑄𑐎𑐾 𑐩𑐵𑐮𑐷
𑐮𑑂𑐫𑐣𑐷 𑐠𑑅𑐐𑐸 𑐴𑑂𑐩𑐳𑐷𑐎𑐵 𑐄𑐧𑐮𑐫𑑂 𑐟𑐎 𑐖𑐎
𑐐𑐸𑐧𑐮𑐫𑑂 𑐟𑐎 𑐗𑐷𑐳𑑃 𑐩𑐵𑑃𑐨𑐵𑐫𑑂 𑐩𑑂𑐰𑐵𑐎𑐵𑐟𑐂
𑐩𑐵𑑃𑐫𑐵 𑐩𑐟𑐶𑐣𑐵𑑃 𑐨𑐫𑑂 𑐧𑑂𑐫𑐹𑐐𑐸 𑐨𑐵𑐳𑑃
𑐩𑐔𑐵𑐫𑐵 𑐴𑐶𑐳𑐶𑐫𑐵𑐟 𑐕𑐵𑐫𑐾𑐥𑑂𑐫𑐹𑐠𑐾𑑃
𑐐𑐣 𑐗𑐷 𑐠𑑅𑐐𑐸 𑐨𑐵𑐫𑑂 𑐴𑐾 𑐩𑐮𑑂𑐫𑑃𑐳𑐵
𑐀𑐣 𑐖𑐸𑐂 𑐩𑐵𑑃𑐫𑐵 𑐩𑐟𑐶𑐣𑐵𑐫𑐵𑐟 𑐴𑐵𑐎𑐸𑐟𑐶𑐣𑐾 𑐠𑐾𑑃
𑐥𑐹𑐰𑑄𑐎𑐾 𑐦𑐿𑐩𑐏𑐹 𑐩𑐔𑐵𑑃𑐣𑑃 𑐠𑑅 𑐩𑐵𑑃𑐫𑐵 𑐳𑐸𑐳𑐵𑑅𑐎𑐸𑐳𑐵𑑅
𑐐𑐸𑐧𑐮𑐾𑑃 𑐡𑐿 𑐩𑐏𑐹 𑐠𑑅 𑐩𑐵𑑃𑐨𑐵𑐫𑑂 𑐫𑐵 𑐧𑐶𑐔𑐵𑑅𑐳𑐔𑐵𑑅
𑐩𑐔𑐵𑐫𑐎𑑃 𑐴𑐾 𑐧𑐵𑐣𑐵 𑐟𑐣𑐵 𑐰𑐣𑐷 𑐏𑑃𑐮𑐵
𑐧𑐾𑐎𑐸𑑃 𑐔𑑂𑐫𑐵𑐫𑑂 𑐩𑐦𑐸𑐐𑐸 𑐰 𑐩𑐵𑐫𑐵 𑐰 𑐩𑐟𑐶𑐣𑐵𑐠𑐾𑑃
𑐎𑐟𑑅𑐨𑐵𑐫𑑂 𑐫𑐵 𑐄𑐣𑑃 𑐕𑐶𑐣𑐵 𑐖𑐎
𑐰𑐫𑑂 𑐦𑐿𑐩𑐏𑐸 𑐠𑐣 𑐕𑐹𑑃𑐣𑑄 𑐴𑑂𑐫𑐹𑐥𑐵𑑅
𑐐𑐸𑐧𑐮𑐫𑑂 𑐣𑐸𑐐 𑐏𑑃𑐫𑐵𑐟 𑐳𑐶𑐔𑑂𑐔𑐸𑐎𑐾 𑐧𑑂𑐰𑐫𑑂 𑐦𑐿 𑐩𑐏𑐸
𑐄𑐧𑐮𑐾 𑐟𑐶𑐣𑐶𑐰𑐿 𑐗𑐷𑐟 𑐩𑐵𑑅𑐐𑐸 𑐢𑐵𑐟𑑂𑐠𑐾𑑃𑐫𑐵 𑐴𑑂𑐫𑐹𑐥𑐵𑑅
𑐠𑑅𑐐𑐸 𑐨𑐵𑐫𑑂 𑐴𑐾 𑐩𑐩𑑂𑐰𑐵𑑅𑐳𑐵
𑐴𑑂𑐩𑐳𑐷𑐎𑐵 𑐗𑐷𑐳𑑃 𑐐𑐣 𑐩𑐵𑐮𑐾𑐐𑐸?
𑐠𑑅𑐴𑑂𑐩𑑃 𑐠𑑅𑐟𑑅𑐴𑐾 𑐩𑐔𑐵𑐫𑐾𑐎𑑃
𑐡𑐸𑐣𑐵 𑐔𑑂𑐰𑐣𑐾𑐩𑐵𑐮𑐷 𑐢𑑂𑐫𑐵𑐔𑐮𑐫𑑂 𑐟𑐸𑑃
𑐰𑐵𑑅 𑐔𑐵𑐫𑐾𑐎𑐾 𑐗𑐷𑐳𑑃 𑐠𑑅𑐴𑑂𑐩𑑃 𑐠𑑅𑐟𑐸𑑃
𑐴𑐣𑐵𑐧𑐣𑐵 𑐫𑐵𑐫𑑂 𑐩𑐵𑑃𑐫𑐵𑐟 𑐠𑑅𑐴𑑂𑐩𑑃 𑐠𑑅𑐟𑐸𑑃
𑐩𑐵𑑃𑐫𑐵 𑐣𑐸𑐐𑑅 𑐐𑐸𑐧𑐮𑐾𑐣𑑃 𑐩𑐳𑑂𑐫𑐵𑐎𑐾
𑐴𑐣𑐵𑐧𑐣𑐵 𑐩𑐵𑑃𑐨𑐵𑐳𑐫𑐵𑐟 𑐩𑑂𑐰𑐵𑐎𑐵𑐟𑐫𑑂
𑐳𑐸𑐨𑐵𑐫𑑂 ! 𑐖𑐫 𑐩𑐵𑑃𑐨𑐵𑐫𑑂
(𑑑𑑑𑑔𑑐 𑐔𑑁𑐮𑐵 𑑒𑑑)
- 𑐳𑐷𑐟𑐵 𑐩𑐴𑐬𑑂𑐖𑐣, 𑐫𑐾𑑃
𑐗𑐷𑐐𑐸 𑐩𑐵𑐐𑑂
𑐗𑐷𑐐𑐸 𑐩𑐵𑐐𑑂 𑐴𑑂𑐣𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐴𑑂𑐩𑐳𑐷𑐎𑐵𑐫𑐵 𑐳𑑄𑐑𑐷𑐫𑐟𑐵
𑐡𑐫𑐾𑐴𑐾𑐩𑐵
𑐣𑐾𑐰𑐵𑑅 𑐬𑐵𑐖𑑂𑐫 𑐣𑐾𑐥𑐵𑐮𑐩𑐞𑑂𑐜𑐮𑐫𑐵𑐟 𑐳𑐸𑐣𑐶𑐳𑑂𑐔𑐶𑐟 𑐫𑐵𑐫𑐾𑐴𑐾𑐩𑐵!
𑐴𑑂𑐣𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐩𑐵𑑃𑐨𑐵𑐳𑐫𑐵 𑐱𑐶𑐎𑑂𑐲𑐵 𑐳𑐸𑐣𑐶𑐳𑑂𑐔𑐶𑐟 𑐫𑐵𑐫𑐾𑐴𑐾𑐩𑐵
𑐥𑑂𑐬𑐵𑐠𑐩𑐶𑐎𑑃𑐣𑐶𑐳𑐾 𑐴𑐮𑐶𑑃 𑐧𑑂𑐧𑐣𑐾𑐎𑐸𑐠𑐶 𑐟𑐎𑑂𑐎 𑐣𑐾𑐥𑐵𑐮𑐨𑐵𑐳𑑃 𑐧𑑂𑐰𑑄𑐎𑐾𑐴𑐾𑐩𑐵
𑐣𑐾𑐰𑐵𑑅 𑐬𑐵𑐖𑑂𑐫 𑐡𑐸𑐣𑐾 𑐳𑐬𑐎𑐵𑐬𑐶 𑐨𑐵𑐳 𑐣𑐾𑐥𑐵𑐮𑐨𑐵𑐳 𑐖𑐸𑐫𑐾𑐴𑐾𑐩𑐵
𑐏𑐳𑐨𑐵𑐳𑐫𑐵𑐟𑐠𑐾𑑃 𑐗𑐷𑐐𑐸 𑐨𑐵𑐳𑐫𑐵𑐟𑐣𑑃 𑐗𑐷𑐐𑐸 𑐠𑐵𑐫𑑂 𑐧𑐷𑐴𑐾𑐩𑐵
𑐴𑑂𑐣𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐣𑐾𑐥𑐵𑐮 𑐳𑑄𑐰𑐟 𑐕𑑂𑐫𑐾𑐮𑐾𑐴𑐾𑐩𑐵
𑐠𑑂𑐰 𑐬𑐵𑐲𑑂𑐚𑑂𑐬𑐷𑐫 𑐳𑑄𑐰𑐟 𑐳𑑃𑐰𑐶𑐢𑐵𑐣𑐫𑑂 𑐡𑐸𑐠𑑂𑐫𑐵𑐎𑐾𑐴𑐾𑐩𑐵
𑐣𑐾𑐰𑐵𑑅 𑐕𑐰𑐵𑑅 𑐗𑐷𑐐𑐸 𑐴𑑂𑐩𑐳𑐷𑐎𑐵 𑐗𑐷𑐳𑑃 𑐠𑐸𑐂𑐎𑐾𑐴𑐾𑐩𑐵𑑋
𑐴𑑂𑐩𑑀𑐖𑐹𑐳𑐵𑑃 𑐠𑐸𑐮𑐶𑐫𑐵 𑐩𑐵𑐐 𑐗𑐷 𑐣𑐾𑐰𑐵𑑅𑐟𑐾𑐳𑑃 𑐫𑐵𑐫𑐾𑐴𑐾𑐩𑐵𑑋
– 𑐜𑐵. 𑐳𑐸𑐰𑐣𑑂 𑐰𑐖𑑂𑐬𑐵𑐔𑐵𑐬𑑂𑐫
