Conspiracy to divide Nepal Mandala, the heartland of the Newah community

Yen, Nepal Mandala – The recently submitted Federation model to divide Nepal into fourteen states by Constitution Committee to the Constitution Assembly chairman is not acceptable to the indigenous Newah community of Nepal Mandala area. The new demarcation of Newah area has been limited only to three districts of Kathmandu, Lalitpur, Bhaktapur despite the Nepal Mandala area consisted of nine more districts such as Kabhre, Dolakha, Rasuwa, Dhading, Nuwakot, Ramechhap, Sindhuli, Sindhu-palchok, and Makawanpur. Except some self-claimed Newah leaders, the new demarcation – the smallest of the fourteen states can not be acceptable to the Newah community both at home and aborad. It is nothing but a consipiracy to divide Nepal Mandala and its indigenous residents and take advantage of the conflict erupting from the inter-ethnic violence. Read more below in Nepal Bhasa.

नेपालमण्डलया म्ह, ल्हाः, तुति त्वाल्हाना इना बिइगु कुतः(सन्दर्भ – १४ प्रदेशय् नेपालमण्डल लागा)
– बिनोद साय्मि (आल)

ने.सं. ११३० चिल्ला १, सोमवाः

* नेवाःतयगु मूबस्ति पुर्व पश्चिम ब्यानाच्वंगु दु। तामाङतेसँ नेवाःतयतः छचालिं घेरे याना तःगु गननं मदु।
* नेवाः देय् दबूलिं नेपालमण्डलया नक्शा छगू हे पिकाय मफुसा गथे नेवाः राज्य धस्वाइ?
* १४ प्रदेशय् नेवाः राज्ययात फ्याना तःगु भूमियात नेवाःतेसँ स्वीकार याये मज्यू।

नेवाः थायबाय्
नेवाःया हे नां क्वःकया ”नेपाल” देसया नां च्वन। उलिउलि मछिं ताःहाकःगु सुवर्ण ईतिहास दया द्वलँद्व तकँ देय् न्ह्याका वया च्वंपिं नेवाःतयगु लागा थौं येँ, यल, ख्वप, धुलिखेल जःखः व चित्लांगय् दुने कुना बिइगु कुत जुया च्वंगु दु। नेपालमण्डल नेवाःया लागाय् दुने दयेकाः तःगु देगः, ६४ शिवलिंग, २४ बौद्धपीठ, नेवाः नं सदां राज्य याना वयाच्वंगु दोलखा, नुवाकोट, नेवाःत थौं नं आपालं आपाः ल्याखय् च्वना वया च्वंगु धादिङ, रामेछाप, व सिन्धुलीया गा.बि.स.त नेवाः पहिचानया थाय् मखुत ला? पृथ्वीनारायण शाहनं आक्रमण याना नेपाः लाका काःसाँनिसें, राज्यशक्तिं हे नेवाःतयतः कमजोर यायेगु याना हल। नेपाःया शासक बर्ग व शासक जाति बर्मू, खयतयसँ ब्यक्तियात पद व तक्माया लोभय् तक्यंका सुं नेवाः ब्यक्तिया उन्नति याना ब्यूगु दै। अयनँ सांगठनीक रुपं नेवाः जाति, भास, संस्कृति, समान अधिकारया ल्याखं साम, दाम, दण्ड, भेदया दक्व ज्याभः छ्यलाः नेवाःतयतः धाःसा कमजोर यायेगु ज्या यानातु हयाच्वन। थुकीयातहे निरन्तरता बीकथँ थौं वया राज्य पुनसंरचना समितिं पित हःगु नेपालमण्डल प्रदेशयात धका फ्याना तःगु लागाँ क्यं। प्रदेशया नामं “नेवाः” नां छगू जक दु। नेपालमण्डल, नेवाः प्रदेशया लागा धैगु येँ, यल, ख्वप, धुलिखेल जःखः, चित्लाङ जक मखु, थ्व ला नेवाः लागाया छ्यं जक खः। थौं राज्य पुनसंरचना समितिं पित हःगु १४ प्रदेशया नक्शाय् नेवाः राज्ययात नेपालमण्डल लागाया छ्यं छगः जक ध्यना नेवाः राज्यया नामं ल्यंका म्ह, ल्हाः तुति त्वाः ल्हाना तामसालिंग, नारायणी व सुनकोशी प्रदेशय् ब्वथला बिल। नेपालमण्डल लागा ब्लथला इना बिइगु ज्याय् मेपिंसं यासा अपायच्वं आश्चर्य जुइम्वाःगु। अयनँ, थुकी नेवाः नेतात धाःपिंनिगु हे ल्हाःदूगु न्यनेमाःगु नेवाःया नितिं तःधंगुहे दुखया खँ जुयाबिल।

नेवाःया ऐतिहासिक नेवाः पहिचान दूगु नेपालमण्डल लागा मध्यमाञ्चलया १२ गू जिल्ला दुने ला। थौं तकं नं नेवाःत १२ गू जिल्लाया थाय्थासय् च्वनाच्वंगु दूसा थुकीया दथूया भू भागय् ला तामांगतयेगु ल्याः स्वया नेवाःतयगु ल्याः म्हो मजू। थौं नं पुर्वया रामेछाप, दोलखा निसें छस्वाः जुइक न्ह्या वयाच्वंगु नेवाःया बस्ती दथुइ येँ, यल, व ख्वप जुजुं पश्चिमया नुवाकोट व धादिंग तक नेवाःया बस्ति यचुक सीदु सा, उगु थाय् तामांगतयेसँ दाबी यायेगु आधार हे मदु। अझ ला धादिङया नं पश्चिम वंसा नेवाः बस्ती स्वाक्कतुं गोरखाया नेवाः बस्ति दु। हाकनं पूर्वय् वंसा रामेछापया नेवाः बस्ति स्वाक्क ओखलढुंगाय् नेवाः बस्ती दु। थुकथं नेवाःतय्गु बस्ति अप्वः म्ह्वः जुया न्यंकः दूसा, मू कथं नेवाःया बस्ति धाःसा पुर्व पश्चिम ब्यानाच्वंगु खः। थुज्वःगु सत्य इतिहासयात बाँलाक अध्ययन मयासें हे नेवाःयात छचालिं तामागं घेरेयाना च्वंगु दु धैगु भ्रम प्रचार यानातःल।

नेवाःत देस दयेका, गां दयेकाः त्वाः दयेका छथाय् मुना च्वनेमापिं जाति खः, छरे जुया च्वनीपिं मखु। थौं थ्व हे छथाय् मुना च्वनेगु नेवाःया गुणय् राजनिति म्हिताच्वन। पृथ्वी नारायण शाहनं नेपाः लाका कायेधुंका निसें थौं तकं शासक वर्गतय्सं नेवाःतय्गु लागाय् आपालं आपा ल्याखय् गैर नेवाःतय्त बास याकेगु दीर्घकालिन योजना न्ह्याकल। नेवाः च्वनाच्वंगु थायस् यक्व “आगन्तुक” मनूत नं राजधानी जूगुया ल्याखं, सुबिधाया ल्याखं, नोकरी, ज्या यायेत आदिया ल्याखं दुहा वयातुं च्वन। थथे नेपाःया कुं कुलामं नेवाःतय्गु लागाय् मनूत च्वं वयाच्वंगु इलय् तामांगतनं मवै धैगु जुइमखु। अथे जुया नेवाः च्वनाच्वंगु थासय् नेवाःत छगू लाख दूसाँ नेवाः अल्पमत खने दयाच्वंगु जक खः।

नेवाः आन्दोलन
नेवाःतय्सं भाषिक आन्दोलन न्ह्यकातिनि मेमेपिं जाती जनजातिंतेसँ उज्वःगु आन्दोलन न्ह्याकाहःगु। थौं नेवाःया भाषिक आन्दोलन, जातिय आन्दोलनय् हिला वःगु दु। थुलि ई दुने थीथी पार्टिं प्रेरितपिं थीथी बिचार धारां प्रभावित जूपिं नेवाःतय्सं न्हू न्हूगु नेवाः खलः, पुचः थःथः यःसें म्हतिं म्हतिं स्वना हल। उपिं मध्यय् गुलिं ला तना नं वन। थथे यायेगुया मू ल्हाःला न्ह्याबलेँ राजनैतिक पार्टितय्सं नेवाःतय् दथुइ थःथःगु पार्टिया बर्चस्व दयेका तयेत स्वगुलिं खः। नेवाःत राजधानीइ च्वनाच्वंगु जूगुलिं सकलें पार्टितय्तसं राजधानी दूगु थासय् थःगु प्रभाव प्रभुत्व कायम यायेगु आवश्यक नं जुइ। अथे जुया हे नेवाःतय्त राजनैतिक पार्टि व शासक बर्गतयसं न्ह्याबलेँ छगू च्यूताः कायेमाःपिं जाति कथं कयातल। थुकथं नेवाःतय्त न्ह्यागुँ राजनैतिक पार्टितय्सं भिं बाय् मभिंगु न्ह्यागुकथँ च्यूताः कायेगु यानाच्वंसां नेवाःतय्सं थुकियात भिंगु लँपुइ यंकेत देसय् समान हक अधिकारया मंकाः सः ज्वना सकस्यां भिंया नितिं छ्यला यंके माःगु खः। बरु थुकिया अःखः नेवाःतय्त (नेवाः नेतातय्त) थीथी राजनैतिक पार्टितय्सं छ्यला नेवाःत कुचा थलेगु, नेवाःत ल्वाकेगु, नेवाःतयेतः कमजोर याकेगु ज्याय् उपिं पार्टित, शासक वर्गत जकं सफल जुयाच्वन।

थौं नेपाः संघिय संरचना वना युगान्तकारी परिवर्तन जुइगु ज्या जुयाच्वंगु इलय् तकं नेवाः नेताः सकलें छवाः जुइ फयाच्वंगु खनेमदया नेवाःत “मां मदुम्ह मचा” थें अशरण जुया च्वन। थुकिया भू दशरथ रंगशालाय् नेवाः राज्य घोषणा सभाय् नेपालमण्डलया नक्शा पिकायेगु मज्यू व पिकायेके बिइ मखु, नेपालमण्डलया नक्शा पिकाःसा नेवाः संघर्ष समितिइ च्वनेमखु धैपिं नेवाः नेताः धाःपिं पिहां वःगुलिं छ्यातां उला बिल। दशरथ रंगशालाय् अपाय्धंगु नेवाः राज्य घोषणा याये फूपिं नेताःतय्सं नेवाः राज्य गनले धका क्यना बी मफूगु दुःखया खँ खः। नेवाः राज्यया नक्शा पिथनेत दक्व तयारी याना तःगु जुया नं छम्ह निम्ह नेवाः नेताःतय्सं नेवाः राज्यया नक्शा पिकायेत माने मजु धायेवं छु दक्व नेवाःत सलिचाय् लः तया दुबिना सिना वनेगु ला?

नेवाः लागा व नेवाः न्ह्यलुवा
नेवाः न्ह्यलुवातय्सँ नेपालमण्डलया लागा व तामांगया लागा विवादयात छुं च्यूता तःगु खने मदु। तःदँ न्ह्यवहे माओवादिं जनयुद्धया इलय् हे जिल्ला जिल्ला ब्वथला नेवाःयात येँ, यल, व ख्वप स्वंगू जिल्लां जक तया हःबलय् हे नेवाः नेतातय्सं सचे याये माःगु थासय् अथे मयाना द्वंकल। माओवादिंनं नेवाः भावना अःखः ज्या याये बहमजूगु थुइके माःगु खः। उबलय् थ्व छूँ मखु, आः यात अथें जक ज्याना तःगु धका सुम्क च्वनाबिल। उबले द्वंकूगुया लिच्वः आः खनेदत। अझला राजेन्द्र श्रेष्ठं बांलाक्क अध्ययन मदयेकं बाय् छगू राजनैतिक भाषण कथं बाय् तामांगतय्त थकाय् कथं नेवाःतयगु थाय् धैगु धुलिखेल व चित्लाँ जक खः धका थाय्थासय् भाषण याना जुया नेवाःतय्त मानसिक रुपं हे कमजोर यायेगु सुरु यासें नेवाःया म्ह, ल्हाः, तुति त्वथलेगु क्रम दकलय न्हापा न्ह्याकल। भलसा काये वयकःपिन्सं थुज्वःगु कमजोरीयात दुनुगलं थुइका कया सकस्यां भिंया नितिं थःगु बिचाः व ई छ्यली। नेवाः देय् दबुलिं नेवाःतय्गु लागा ऐतिहासिक नेवाः पहिचानया भुमि खः धायेगु याःसां, देय् दबूया सः धाःसा सुनानं ताइभनं छुँप्वालय् सुला हाला च्वंथें खः ला धैथेँ च्वँ। संविधान सभाय् नं नेवाः लागायात कया सुनां नं च्यूता प्वंका न्ववापिं सुं छम्ह सभासद मखना। छम्हयां छम्ह जक जूसां नेपाः राष्ट्रीय पार्टिया सभासद बुद्ध साय्मिं नेवाः लागा धका फ्याना तःगु लागाय् असहमत क्यंसें निगूलिं नक्शायात समर्थन मयासें फरक मत तःगु जुयाच्वन। नेपाः राष्ट्रीय पार्टिं संविधान सभाय् सभासद बुद्ध साय्मि पाखेँ पेश याःगु नक्शाय् अझंनं अध्ययन यायेमाःगु दनी, थुज्वःगु अध्ययन न्ह्याकातुँ च्वने नं माः, दिपाः काये मज्यू। उगु नक्शा व फरक मत छु खः स्वयेत क्वय्या वेब साइत स्वयादिसँ।

http://www.can.gov.np/doc_folder/225State%20Restructuring%20Committtes%20Concept%20paper2.pdf

माओवादिं नेपाःया संघिय संरचना धका जनयुद्धया इलय् छगू खाकाया नक्शा पिथने धुंका वयां ल्यूल्यू न्ह्याःन्ह्याःपिसँ थः यःयःथें नेपाःया संघिय नेपाःया नक्शाया खाका दयेका हल। अथे याःपिं सकसिनं माओवादिं थें नेवाःयात येँ, यल व ख्वप स्वंगू जिल्ला जक तया सिमाना ब्वथला हलं नं नेवाः नेतात म्हुतुइ धौ फिना च्वनेमज्यूगु खः। थथे सुम्क च्वने बलेला मेपिन्सं समर्थन याःगु भापिया काइ। थौं अथे हे जुया बिल। राज्य पुनसंरचना समितिं पिकाःगु नक्शाय् नेवाः राज्यया लागा धका येँ, यल, ख्वप (येँ, यल, ख्वपया दक्वं थाय् मखु नि), धुलिखेल जःखः, व मकवानपुरया निगू गा.बि.स.बज्रबाराहि व चित्लाँ जक याना ९२९ स्क्वायर वर्ग किलोमिटर (०.६ प्रतिशत) भूभाग जक तया तःगु दु। थुगु नक्शा संबिधान सभाय् छलफल वने धुंका तिनि बल्ल लिबाक जूसां नेवाः देय् दबूलिं नेवाःया लागा उलि जक मखु धकाः न्ववाना हल। उलि धया हाकनं नेवाः देय् दबू सुम्क च्वना बिल। थौंया मूवंगु ई दिपाः कया सुम्क च्वनेगु, देनाच्वनेगु ई मखु। थुकिया समाधानया नितिं नेवाःतय्सं, नेवाः देय् दबुलिं छुं यानाच्वनले धैगु खँत न्यने तकं मखंना नेवाःतय्गु नुगः तसकं क्वतुं। अझ नेवाः राज्य थुलि खः थुलि जुइमा धका दँदँ निसें नेवाः देय् दबूलिं विषेशज्ञ तया तयार याःगु नक्शा पिकायेत तकं नेवाः देय् दबुलिं आँट तक याःगु मखःना नेवाःतय् नुगः तसकं ख्वः। सारा संसारं नक्शा पिकाना छलफलय् हये ज्यू संबिधान सभाय् पेश याये ज्यूसा नेवाः देय् दबूलिं जक छाय् दयेका तःगु नक्शा छलफलय् महःगु? सुं तं चाइ धकाः पियाच्वना ला पाय्छि जुइमखु। दँदँ बिइक प्राविधिक, ईतिहासकार, बिशेषज्ञ तया दयेकूगु नक्शा छगू तकं पिकायेत लिफः स्वयाच्वने माःगु छूँ मदुथें च्वँ। झीत सुयां लागा लाका काये माःगु नं मदु , नेवाः पहिचानया थाय्बाय् त्वतेगु नं मज्यू।

नेवाःया लागिं थःगु जीवन जःछि पाना जुपिं नेवाः नेतात नं थौं जि स्वतन्त्र जि मानवअधिकारवादि जक धया जुइगु ई नं मदये धुंकल। नेवाः लागा तंकेत्यंगु इलय् न्ह्यःसू चायेका स्वत्रन्त्त धःका मानवअधिकारवादि जक धया च्वंसां कन्हे ला छिकपिन्त नं शान्ति दै थें मखना। थौं थःगु नेपालमण्डलया ला भाग इना जूगु पने मफुसा छु कन्हेया पुस्तां छिकपिनिगु जय जय कार याइथें च्वँला?

नेवाः लागा भाग तया बिइ दै मखु
देसय् थौं सकस्या थःथु पहिचान मालाच्वंगु इलय् लाक्क सकस्यां नेवाःया पहिचानयात धाःसा लाकमं हे च्वाना ब्यूगु दु। नेवाः धैपिं न्ह्यागु याःसां बाय् न्ह्यागु धाःसाँ ज्यूपिं कतांमरि दयेका म्हितेगु न्ह्ब्वःसा दयेका तःगु खनेदया वल। पाकलं जक हिसाब याःसां नं नेवाः व तामांग जनसंख्या उलिउलितुं ५.५ प्रतिशतया ल्याखय् दूसा लागा धाःसा गथे नेवाःयात ९२९ स्क्वायर वर्ग किलोमिटर (०.६ प्रतिशत भूभाग) जक? सकलें म्वायेमाः सा नेपालमण्डलय् च्वनीपिं म्वायेम्वा ला? थुलि तकं बिचाः मयासें अझला गुपिं नेवाः नेताःत थाय् चिकू जूसा झन राज्य न्ह्याके अःपुइ धका बिचाः कयाच्वन। तःकू जुलकि नेवाःयात थाकुइ धैगु बिचाः याइपिं जुयाच्वन। नेवाः राज्यया भूभाग चिकूसां थ्व थाय्या क्वालिटि स्वयेमा धका धयाच्वन। छिमिसं राजनिति हे मथू धका राजनिति थुम्ह जुया झंगः ल्हायेगु यानाच्वन। नेवाःया थाय् तःकू वा चीकू बाय् क्वालिटि बाय् क्वान्टिटिया गुगुं खँ मखु। थ्व ला मुकं नेवाःया ऐतिहासिक व सांस्कृतिक महत्व दूगु, नेवाःया जीवन नाप भ्यलय् पुना वनाच्वंगु नेवाः पहिचान नेवाः थाय्बाय् नेपालमण्डलया खँ खः। थौं नं नेवाःया बसोवास थुगु थासय तामांगतया स्वया म्हो मजूगु भूभाग अझं यचुक सी दूगु छस्वाःगु थाय्त दनी। नेवाः नाप स्वापु हे मदुगु नेवाः पहिचानया गुगुं भू हे मदूगु, नेवाः गबलें मच्वंगु थाय्यात नेपालमण्डल जुइमा धाःगु मदु सुनानं। थ्व ला नेवाःतय्सं थःगु ऐतिहासिक पहिचान दूगु थासय् थौं तकं अझं नेवाःत च्वनाच्वंगु ल्याखं थ्व नेवाः पहिचान, नेवाः लागा जुइमा धैगुया खँ जक खः। हाकनं नेवाः राज्यय् नेवाः जक च्वनी व च्वनेमाः धैगु नं मदु। तामांगत नं थन हे च्वनाच्वंगु खः सा उमित भागं दयेमाःगु नेवाःयात माःगु मदु, तर नेवाःया जनसंख्याया अनुपातया ल्याखं, प्राकृतिक स्रोत बाँडफाँडया ल्याखं नेवाःया पहिचानया ल्याखं नेपालमण्डलय् जुइमाःगु लागा नेवाः नं त्वते फै मखु। यदि नेपालमण्डलया लागा थौं पाय्छि मजुइक मेमेगु प्रदेशय् ब्वथला ब्यूसां थ्व संघर्ष कन्हे ला मयाइ हे मखु। नेपालमण्डलया लागा भाग तया इनाब्यूगु सिइक सिइकं कन्हेयापिं गथे सुम्क च्वनी?

५.६ प्रतिशत नेवाःतय्गु भूभाग गथे ०.६ प्रतिशत जक? थ्व ला नेवाः नेताःत सुम्क च्वंगुलिं “नेपालमण्डलया घना बस्ती दूगु छेँ जक नेवाः नं थःगु धाये दै नेपालमण्डलया बुँ गुँ, व प्राकृतिक स्रोत नेवाः नं थःगु धाये दै मखु” धकाः हेपे याना हःगु सिबे मेगु छूँ मखु। नेवाःया लागायात तामागतय्गुलिइ तया उमित च्वयच्वय् तया राजनीति याना च्वंगु ला पुलांगु हे खँ जुल। आः हाकनं नेवाःया नापं तामांगया लागा खय्बर्मूतय्त धका दयेकूगु न्हूगु प्रदेश नारायणी व सुनकोशी याना भाग तया बिल।

थौं नं मध्यमाञ्चलया १२ गू जिल्लाया आपालं भूभागय् छस्वा जुइक नेवाःत तामांगत स्वया आपा ल्याखय् च्वंनाच्वंगु थाय् दु। स्वभाविक कथं देय्या ७५ जिल्लां हे येँ, यल, व ख्वपय् मनूत माइग्रेसन जुया च्वं वयाच्वं बले नुवाकोट, काभ्रेपलाञ्चोक, सिन्धुपाल्चोक, दोलखा, रामेछाप, सिन्धुलीया नेवाःत झन च्वं वइगु हे जुल। अथे जुया जनगणनाय् उगु थासय् नेवाःया संख्या जनगणनाया परिभाषा कथं म्हो जुइ। थुपिं जातजाति कथंया माइगे्रसनया तथ्यांक व जातजाति कथं जनसंख्याया बृद्धि दर स्वयेबले यचुक सी दु। अथे धकाः दोलखाय् च्वपिं नेवाःत थीथी सुविधाया नितिं थौं स्वनिगलय् वल उपिं आः गुबलय् नं दोलखाय् लिहाँ वनी मखु धैगु मदु। अथेतुं नुवाकोट त्रिशुलिं नेवाःत येँ थीथी सुविधाया नितिं च्वं वल आः उपिं गुबलय् नं नुवाकोटय् लिहां वनी मखु धैगु मखु। सिन्धुपाल्चोक, दोलखा, रामेछापया नेवाःत ब्यापार यायेत थीथी सुविधा कायेत रौतहत, धनुषा, सिराहा सप्तरी वनाच्वन धायेवं उपिं आः गबलें नं थःगु जन्म भुमि लिहां वनीमखु धैगु मखु। गुगुं सुविधा उपभोग यायेत जक वंपिं ला कन्हे थःगु जन्म भुमिइ सुबिधा दयेवं छन्हु लिहां वनीतिनि। थ्व संभावना संघिय राज्य प्रणाली जुइ बले अझ अप्वः दु छाय् धाःसा थःगु हे थासय् सुबिधा दये धुनेवं स्वैतं नं थःगु जन्म छेँ त्वता व हे सुविधा उपभोग यायेत मेगु प्रदेशय् वने माली मखु। जनगणनाया जातजातिया म्ह ल्याःया तथ्यांकया जक स्वया थुजोगु खँ खने दै नं मखु। अथेतुं थीथी कारणं येँ, यल, ख्वप दुहां वयाच्वपिं संघिय संरचनाय् थःथःथु थासय् सुबिधा दयेवं उपिं नं थःथःगु थासय् हे लिहां मवनी धैगु मदु। लुमंके बहजू नेपाःया जातजाति मध्ये दकलय् अप्वः माइग्रेसन जुयाच्वंगु जाति बर्मू, क्षेत्रीत खःसा वयालिं नेवाःत खः। उकें कन्हे संघिय प्रणाली जुइगु इलय् दकलय् अप्वः मनूत माइग्रेत जुइगु जातित बर्मू क्षेत्रीत जुइसा वयालिं नेवाःत हे जुइ। उकि मध्यय् नं दकलय् अप्वः मनूत माइग्रेसन जूगु खने दैगु थाय् धैगु दकलय् अप्वः जनसंख्या दयाच्वंगु थाय् नेपालमण्डलय् हे जुइगु यचुक सी दु। अझ ला नेपाःया राजधानी हिलेवं थ्व तिब्र रुपं न्हायेफु।

सकस्यां थःथःगु पहिचान मालेगु स्वयाच्वंगु इलय् थौं नेपाःया छगू सम्वृद्ध जाति नेवाःया पहिचान तंके कथं नेवाःयात अपमान जुइकथं हेपे याना नेवाःतय्त हे छयला नेवाः लागा प्रस्तुत यायेगु ज्या याःगु दु। नेवाःतय्सं जातिय स्वशासनयात स्वीकार याःसा नं गुगु नं हालतय् थ्व १४ प्रदेशय् नेवाः राज्ययात धका फ्याना तःगु भूमियात स्वीकार याये मज्यू। थुकियात गुम्हनं नेवाःनं स्वीकार याःना न्ह्याः वनेगु कुतःयात धाःसा व ति तःधंगु दुःख नेवाःया लागि मेगु जुइमखु। नेवाः जनसंख्या, नेपालमण्डल लागाया जनसंख्या व जाति व भुमिया अनुपात तकं पाय्छि मजूगु, छगू राज्य म्वायेत दये माःगु प्राकृतिक स्रोतया बाँडफाँडय् संतुलन मदुगु, नेवाःया ऐतिहासिक व सांस्कृतिक पहिचानया थाय् तकं मेमेगु प्रदेशय् ब्वथला नेवाः पहिचानयात न्हुया ब्यूगु १४ प्रदेशया नेवाःराज्यया लागा नेवातेसँ समर्थन याये मज्यू।
स्वापु gibinod@yahoo.com

छिगु कमेन्ट थन क्वसँ च्वय् तः “Comments” तियादिसँ।

1 thought on “Conspiracy to divide Nepal Mandala, the heartland of the Newah community”

  1. NaayanKrishnaSingh

    We Newa people are so stupid then the Khas lifted us we will reach in the sky high. I could not stand when Newa people are serving Precious Newa Aila to Bahuns who deceived Newa in dividing Newas at the time of declearing Newa Rajya with tiny boundry.

Leave a Comment

Your email address will not be published. Required fields are marked *