झीगु माँभास नेपालभासया आधारहे नेपाल लिपि

(नेवा: सन्देस वा:पौ  ४३(पीस्वँ) ल्याखय् ली पिदंगु च्वसू)

नेवा: सन्देस वा:पौ पिहाँ वसाँनिसे नेपालभास ब्वमितय् नुग: भचा थाहाँ वयाच्वंगुदु धायेमा। थउँतक्क पिहाँव:गु नेपालभासया पौ दथुइ नेवा: सन्देसया पिचुगुभ्वँ, सुभचीँया कलर ह्यांगु कलर जक मखुसे, दुथ्याना च्वंगु बुखँ, च्वसू, विनाखँ, पुलाँखँनँ उतिहे बाँला। कूँख्येने थाय् म्होहे धायेमा। उकुन्हुतिनि झी पासा छम्हेसिनँ बुखँ मगागु केनादिल। बुलुँ बुखँनँ फयाफच्छि तना यंकी धैगु विस्वास दु। नेवा: वा:पौ वा:या छक:साँ स्वये दैगुलिँ सोमवा: वैगु हे न्ह्याइपुसे च्वँ। थुगुसिया ल्या स्वया बलेला अतिकँ हे लसता व:गु खँ ब्वनेदत। नेपाललिपि थाँ (नेपाललिपि स्तम्भ) या दुने दकले न्हापाँ झीगु माँभास नेपालभासया आधार नेपाललिपि सयेकेगु थाँ सुरुयाना, झीगु वर्णमालाया दकले न्हापाँगु आख: “अ” च्वयेगु स्येनातल। नेपाललिपि आख: ल्हातँ च्वयेगु जक मखुसे प्रिन्ट यायेगु ज्याय् नँ यक्व अनुभव दुम्ह विपिन भाजुँ च्वयेगु याना दिल। थ्व तसकँ हे बाँलागु ज्या जुल। नेवा: सन्देस वा:पौया बदन शर्मा सम्पादकजु नापँ सकलसित: झीगु दुनुगलँ निसेँ हे यक्क यक्व सुभाय देछाना च्वना।  
 
ख:जा नेपाललिपिया छम्ह सयेकामि, नेपाललिपिप्रेमि, वा नेपाललिपि इनकोडिङ कमिटियाम्ह छम्ह दुज: धायेला छुधाय्, पासापिन्त नेपाललिपि छ्येलेमागु आवश्यकता बारे कारुनिककथँ इनाप याना वया च्वनागु तदँहे दयेधुंकल। नेपालभासँ नेपालय् पिहाँ वैगु पौया सम्पादक, पिकाक पासापिँ (नापँ थकालिपिँ हने बहपिन्त:) छिकपिनिगु नेपालभासया पौ नेपाललिपिँ पिकयादीमाल धका धया वया च्वनागुनँ यक्व हे दत। ख:जा नेवा: सन्देसया कार्यकारिणि सम्पादक रुपा महर्जन मयेजु नापलायेगु भाग्य दुबले, केहेँमयेजुयातनँ थथेहे इनाप यानागु जुल। नेपालभासया पौ, नेपाललिपिँ पिकायेगु यायेमाल धका। छकलँ नेपाललिपिँ पिकाय् बले ब्वनीपिँ म्हो जुइगुलिँ फुसा छपाना जक जूसा नेपाललिपियात थाय् बियेमाल धका लुमंकागु बखते रुपा मयेजुँ, “ज्यू दाइ बिचा याना स्वय्” धका तयादीगु बचँयात झीसँ तयागु विस्वासया लिच्वकथँ, थउँ नेवा: सन्देस ल्या ४१ (पीछ) पागु ल्याखय् नेपाललिपिया छग: आखलँ जूसाँ नेपाललिपियात छ्येलेगु सुरुया:गु स्वयदत। झीगु दुनुगलँ निसेँ रूपा केहेँ मयजु नापँ सकल नेवा: सन्देस वा:पौया ज:पीन्त हानँ छक: सुभाय् बिया च्वना।
 
आ: थ्व नेपाललिपियात गथेयाना छ्येलेगु या:सा जीले, धैगु खँय् छतानिता छ्याता च्वया च्वना। झीगु अध्ययनकथँ नेपाललिपि प्रेमि धैपिँ झी नेवा:त सकलेँ ख:साँ, नेपाललिपि स:पिँ, स:साँ बानि मदुपिँ व नेपाललिपि सयेकेय:पिँ स्वथी दु। थ्व स्वथीया ब्वनामिपिन्त: नेवा: सन्देस वा:पौया नेपाललिपि थामय् थाय् बियेफु।
१) नेपाललिपि स:पिँनिगु लागी, नेपाललिपिँ हे बुखँ जुलला, च्वखँ वा चिनाखँ जुलला छत्वा दुथ्याकेगु।
२) नेपाललिपि स:सा बानि मदुपिनिगु लागि नेपाललिपिया छत्वाचा खँ च्वया, नेपाललिपिया त:ले देवनागर आख: लिधँसा (transcribe) कथँ च्वयेगु
३) अले नेपाललिपि सयेकेय:पिनिगु लागी छग: छग: याना आख: च्वयेगु तरिका स्येनेगु।
 
थथे स्वता ज्या दुथ्याका नेवा: सन्देसँ नेपाललिपि थाँ यात झ:झ: धायेका दियेफु। थुकीँ नेपाललिपि प्रचार यायेगु ज्याय् नेवा: सन्देस वा:पौया देन झी नेवा:तेसँ जक मखु नेपाल देसया इतिहासVहे हनेगु ज्या जुया वइगु शंका हे मदु। नेवा: सन्देसँ बिया च्वनीगु हसना “नेवा: नुग: स: थ्वयेकेगु नितिँ नेवा: सन्देस वा:पौ”  कथँ नेवा:तेगु स:यात क:घाय् फयेमा धका भीँतुना च्वना।
 
– सुवन् वज्राचार्य
  नेपाललिपि इन्कोडिङ कमिटिया अन्तर्राष्ट्रीय संयोजक,
  त्सुकुबा हलिँब्वनेकुथि, जपान