Dr. Padma Ratna Tuladhar presides over the 18th World Indigenous Day celebrations in Tokyo

तो:क्यो: (ने.सं. ११३२ गुँलागा/श्रावणकृष्ण ११(एकादसि) – नेपाल आदिवासी जनजाती महासंघ जपानया ग्वसालय् १८ (झिंच्या) क:गु हलिँ (विश्व) आदिवासी दिँया लसताय् आदिवासी जनजातीया अग्रज नाय:, पूर्व मन्त्री नापँ मानव अधिकारकर्मी डा. पद्मरत्न तुलाधरया मूपाहाँसुइ तो:क्यो: शहरे म्हिग झ:झ: धायेक हन। 

मूपाहाँया आसनँ नवानादिसे डा. तुलाधरँ, संघीयताँ देस टुक्रा मजुइगु धारणा व्यक्त याना दिल। थ्व भ्रमजक ख:सा, थ्वहे भ्रमँ याना संविधान सभाया अवसान जूगु कना दिल। नेपालय् न्ह्यागु महत्वपुर्ण बिषययातनँ अन्तिम इलय् वया बहस याइपिँ नेतातयेगु परिपाटी दूगु केना दिल। ” आदिवासी जनजातीत लिसे स्वागु संघीयता थेँ जा:गु दकले महत्वपूर्ण बिषययात दलतेसँ अन्तिम इलय् बहस यागु त्रुटीपूर्ण जूगु व उकीँहे याना संविधान सभाया अवसान जुल।” संघियताया बारे दलत व दलते नेतातेसँ जनतायात भ्रम फिंजे या:गुलिँ मुलुक जटिल परिस्थिती कुतुँवंगु केनादिल।

विशेष पाहाँ जपानया लागि नेपाल राजदूत डा. मदनकुमार भट्टराईनँ आदिवासी दिँया लसताय् भीँतुनादिसे देस विकासया लागि जपान व जर्मनीथैँ जा:गु निक:गु हलिँ युद्धय् ध्वस्तजूगु देसत झीगु लागी दसू ख: धयादिल।  थ्व राष्ट्रते विकासया ल्यूने कार्यगत एकता, इमान्दारिता व मेलमिलाप हे महत्वपूर्ण जूगु खँ कनादिल। जपानय् अप्व जुया वै च्वंगु नेपालीतयेगु आत्महत्याया शृंखलाँ बाँलागु हसना मवनीगु धयादीसे, समाज व परिवारया मनोवल गिरे जुइगुलिँ सचेतनामुलक ज्याझ्वया आवश्यकता केनादिल। 

महासंघया सल्लाहकार एवं १८ (झिंच्या) क:गु हलिँ (विश्व) आदिबासी दिँ ग्वसाखल:या संयोजक डा. दिनेश मानन्धरया लसकुस न्वचुलिसे सुरुजूगु थ्व ज्याझ्वलय् एनआरएन जपानया नाय: ओम गुरुङ, सल्लाहकार रेखब्लोन तामाङ, थकाली सेवा समितिका अध्यक्ष शरदकुमार गौचनपिसँ जपानया जनजाती न्ह्यलुवातेसँ आदिवासी जनजाती आन्दोलनया थीथी पक्षया बारे नावाना दिल। कुल जनसंख्याया ४० प्रतिशत आदिवासीत दूगु देसय् आदिवासी जनजातीया आधारभूत अधिकारँ अझनँ वञ्चित जुया च्वनेमागु इलय् आदिवासी जनजातीतेत: अधिकार सम्पन्न याना संघीयताय् वनेगुया अर्थ देश टुक्रे जुइहे मफैगु धारणा तया दिल। 

ग्वसाखल:या नाय: ध्रुब भट्टचनया सभापतित्वय् हंगु थ्व ज्याझ्व: महासंघया मूछ्याञ्जे पासाङ शेर्पाँ न्ह्याका दीगु ख:।

(किपा: साभार – नेपालजपान.कम्)