𑐩𑑀𑐴𑐣𑐶 𑐣𑐏𑑅 𑐧𑐮𑐫𑑂 𑐣𑐂𑐐𑐸 𑐨𑑀𑐫𑑂

𑐜𑐵. 𑐳𑐸𑐰𑐣𑑂 𑐰𑐖𑑂𑐬𑐵𑐔𑐵𑐬𑑂𑐫

𑐣𑐾𑐥𑐵𑐮 𑐡𑐾𑐳𑐫𑑂 𑐡𑐔𑑂𑐕𑐶𑐫𑐵 𑐡𑐸𑐣𑐾 𑐠𑐷𑐠𑐷 𑐣𑐏𑑅 𑐴𑐣𑐷 𑑋 𑐡𑐎𑐮𑐾 𑐟𑑅𑐢𑑄𑐐𑐸 𑐣𑐏𑑅 𑐣𑑂𑐴𑐹𑐡𑑃 𑐴𑐣𑐵 𑐣𑑂𑐴𑑂𑐫𑐵𑐂𑐐𑐸 𑐳𑑂𑐰𑐣𑑂𑐟𑐶 𑐣𑐏𑑅 𑐏𑑅𑑋 𑐡𑑃𑐫𑐵 𑐡𑐎𑐮𑐾 𑐮𑐷𑐥𑐵 𑐴𑐣𑐷𑐐𑐸 𑐣𑐏𑑅𑐫𑐵𑐟 𑐩𑑀𑐴𑐣𑐶 𑐣𑐏𑑅 𑐢𑐵𑐂 𑑋 𑐩𑑀𑐴𑐣𑐶 𑐣𑐏𑑅 𑐥𑐾𑐠𑐷 𑐡𑐹𑐐𑐸 𑐂𑐟𑐶𑐴𑐵𑐳 𑐡𑐸𑐳𑐵𑑃, 𑐎𑑁𑐮𑐵𑐠𑑂𑐰 𑐥𑐵𑐬𑐸𑐣𑐶𑐳𑐾𑑃 𑐡𑐳𑐩𑐶 𑐟𑐎 𑐴𑐣𑐷𑐐𑐸 𑐣𑐏𑑅 𑐟𑑅𑐖𑐶𑐎 𑐴𑐣𑐷 𑑋 𑐠𑑂𑐰 𑐣𑐏𑑅 𑐣𑐾𑐥𑐵𑑅𑐩𑐶𑐫𑐵 𑐠𑐷𑐠𑐷 𑐥𑐸𑐔𑐮𑑃 𑐠𑑅𑐠𑑅𑐐𑐸 𑐥𑐴𑐮𑑃 𑐗𑑅𑐗𑑅 𑐢𑐵𑐫𑐾𑐎 𑐴𑐣𑐷 𑑋 𑐥𑐵𑐬𑐸𑐣𑐶𑐳𑐾𑑃 𑐡𑐳𑐩𑐶 𑐟𑐎𑑂𑐎 𑐴𑐣𑐷𑐐𑐸 𑐩𑑀𑐴𑐣𑐶 𑐣𑐏𑑅𑐫𑐵𑐟 𑐩𑐾𑐥𑐶𑐳𑑃 “𑐡𑐱𑐿𑑃” “𑐡𑐳𑐴𑐬𑐵” 𑐢𑐎𑐵 𑐣𑑃 𑐢𑐵𑐂 𑑋 𑐡𑐳𑐩𑐶 𑐢𑐿𑐐𑐸 𑐳𑑄𑐳𑑂𑐎𑐺𑐟 𑐏𑑃𑐐𑑂𑐰𑑅 𑐀𑐥𑑂𑐬𑐨𑑄𑐳 𑐖𑐸𑐫𑐵𑑅 “𑐡𑐱𑐿𑑄” 𑐖𑐹𑐰𑑄𑐐𑐸 𑐏𑐣𑐾𑐡𑐸 𑑋

𑐩𑑀𑐴𑐣𑐶 𑐣𑐏𑑅 𑐱𑐎𑑂𑐟𑐶 𑐳𑐵𑐢𑐣𑐵 𑐫𑐵𑐣𑐵 𑐀𑐳𑐟𑑂𑐫𑐫𑐵𑐟 𑐴𑑂𑐣𑑄𑐎𑐵 𑐳𑐟𑑂𑐫𑐫𑐵𑐟 𑐟𑑂𑐫𑐵𑐎𑐾𑐟 𑐡𑐸𑐬𑑂𑐐𑐵 𑐡𑐾𑐰𑐶 𑐣𑐵𑐥𑑃 𑐡𑑂𑐫𑑅 𑐡𑐾𑐰𑐶𑐥𑐶𑐣𑑂𑐟 (𑐁𑐖𑐸 𑐀𑐖𑐶𑐩𑐵𑐥𑐶𑑃) 𑐥𑐸𑐖𑑂𑐫𑐵𑐣𑐵 𑐠𑑅𑐠𑐶𑐟𑐶 𑐮𑐶𑐳𑐾 𑐨𑑀𑐫𑑂 𑐣𑐫𑐵 𑐗𑑅𑐗𑑅 𑐢𑐵𑐫𑐾𑐎 𑐘𑐵𑐫𑐾𑐎𑐷 𑑋 𑐠𑑂𑐰 𑐣𑐏𑑅 𑐐𑐸𑐧𑐮𑐾 𑐣𑐶𑐳𑐾𑑃 𑐘𑐵𑐫𑐾𑐎𑐾𑐐𑐸 𑐫𑐵𑐟 𑐢𑐿𑐐𑐸 𑐏𑑃 𑐥𑐵𑐫𑐕𑐶𑐎𑐠𑑃 𑐢𑐵𑐫𑑂 𑐠𑐵𑐎𑐸𑐳𑐵𑑃, 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷 𑐎𑐠𑑃 𑑑𑑒 𑐐𑐹 𑐳𑐡𑐶𑐥𑐵𑐏𑐾 𑐖𑐫𑐳𑑂𑐠𑐶𑐟𑐶 𑐩𑐮𑑂𑐮 𑐖𑐸𑐖𑐸𑐫𑐵 𑐥𑐵𑐮𑑃 𑐣𑐶𑐳𑐾𑑃 𑐣𑑂𑐴𑑂𑐫𑐵𑐟 𑐢𑐵𑐂 𑑋 𑐩𑑀𑐴𑐣𑐶 𑐧𑐮𑐾 𑐣𑐾𑐥𑐵𑑅𑐩𑐶𑐟𑐾𑐳𑑃 𑐐𑐸𑐎𑐠𑑃 𑐨𑑀𑐫𑑂 𑐡𑐫𑐾𑐎𑐵 𑐕𑐸 𑐕𑐸 𑐣𑐂 𑐢𑐿𑐐𑐸 𑐳𑐷𑐎𑐾𑐐𑐸 𑐠𑑂𑐰 𑐔𑑂𑐰𑐏𑑃𑐫𑐵 𑐮𑐕𑐾 𑐏𑑅𑑋

𑐩𑑀𑐴𑐣𑐶 𑑑𑑐 (𑐗𑐶) 𑐣𑑂𑐴𑐸 𑐴𑐣𑐷𑐐𑐸 𑐣𑐏𑐮𑐫𑑂 𑐀𑐳𑑂𑐟𑐩𑐶 𑐰𑐵 𑐔𑑂𑐫𑐵𑐣𑑂𑐴𑐸 𑐎𑐸𑐣𑑂𑐴𑐸 𑐧𑐴𑐣𑐷 𑐎𑐸𑐕𑐶𑐨𑑀𑐫𑑂 𑐣𑐂 𑑋 𑐎𑐸𑐕𑐶𑐨𑑀𑐫𑑂 𑐢𑐿𑐐𑐸 𑐠𑑅 𑐎𑐸𑐮𑐫𑐵𑐥𑐶𑑃 𑐨𑑀𑐕𑐶𑑃 𑐧𑑂𑐰𑐣𑐵 𑐣𑐂𑐐𑐸 𑐨𑑀𑐫𑑂 𑐫𑐵𑐟 𑐢𑐵𑐂 𑑋 𑐐𑐸𑐴𑑂𑐩𑐾𑐳𑐶𑐣𑑃 𑐠𑑂𑐰 𑐏𑑃 𑐩𑐳𑐶𑐫𑐵 𑐎𑐸𑐕𑐶 (𑑒 𑐩𑐣𑐵) 𑐣𑑂𑐴𑑂𑐫𑑄𑐐𑐸 𑐎𑐸𑐮𑐶𑑃 𑐧𑐖𑐶 𑐡𑐵𑐣𑐵, 𑐎𑐾𑐬𑐵 𑐮𑐥𑑂𑐟𑐫𑑂 𑐟𑐫𑐵 𑐀𑐳𑑂𑐚𑐩𑐵𑐟𑐺𑐎𑐵𑐫𑐵 𑐥𑑂𑐬𑐟𑐶𑐎 𑐕𑐔𑐵𑐏𑐾𑐬𑑃 𑐏𑐫𑑂𑐥𑐶, 𑐔𑐫𑑂𑐥𑐶, 𑐎𑑅𑐳𑐹, 𑐴𑐵𑐎𑐸𑐩𑐸𑐳𑑂𑐫𑐵𑑅, 𑐨𑐸𑐟𑐶, 𑐥𑐵𑐮𑐸 𑐰 𑐏𑑂𑐰𑐵𑐏𑑅 (𑐮𑐿𑑄𑐫𑐵 𑐴𑑅) 𑐑𑐵𑐳𑐵𑐟 𑐣𑐵𑐥 𑐠𑐷𑐠𑐷 𑐑𑐵𑐳𑐵 𑐖𑑂𑐰𑐬𑐫𑑂 𑐫𑐵𑐣𑐵𑑅 𑐟𑑅𑐖𑐶𑐎 𑐣𑐂𑑋

𑐩𑑀𑐴𑐣𑐶𑐫𑐵 𑑙 (𑐐𑐸) 𑐣𑑂𑐴𑐸 𑐎𑐸𑐣𑑂𑐴𑐸 𑐳𑑂𑐫𑐵𑐎𑑂𑐰𑐟𑑂𑐫𑐵𑐎𑑂𑐰 𑐢𑐎𑐵 𑐳𑐟𑐸𑐨𑐟𑐸 (𑐡𑐸𑐐𑐸 𑐰 𑐴𑐾𑑃) 𑐳𑑂𑐫𑐵𑐣𑐵 𑐡𑑂𑐫𑑅𑐫𑐵𑐟 𑐧𑐮𑐶 𑐧𑐶𑐫𑐵 𑐨𑑀𑐫𑑂 𑐣𑐫𑐾𑐐𑐸 𑐔𑐮𑐣 𑐡𑐸𑐳𑐵𑑃, 𑐧𑐸𑐡𑑂𑐢 𑐩𑐵𑐬𑑂𑐐𑐶 𑐣𑐾𑐥𑐵𑑅𑐩𑐶𑐟𑐾𑐳𑑃 𑐰𑐶𑐱𑑂𑐰𑐎𑐬𑑂𑐩 𑐥𑐸𑐖𑐵 𑐢𑐎𑐵, 𑐠𑐴𑑂𑐩𑑃 𑐕𑐾𑐮𑐷𑐐𑐸 𑐖𑑂𑐫𑐵𑐨𑑅 𑐥𑐸𑐖𑑂𑐫𑐵𑐣𑐵 𑐠𑐸𑐎𑐸𑐣𑑂𑐴𑐸𑐫𑐵 𑐣𑐏𑑅 𑐴𑐣𑐷 𑑋 𑐠𑐸𑐧𑐮𑐾 𑐠𑑅𑐩𑑂𑐴𑑃 𑐐𑐂𑐐𑐸 𑐳𑐵𑐂𑐎𑐮𑑂 , 𑐩𑑀𑐚𑐬 𑐳𑐵𑐂𑐎𑐮𑑂 , 𑐩𑑀𑐚𑐬𑑂 𑐎𑐵𑐬𑑂 𑐥𑐸𑐖𑑂𑐫𑐵𑐫𑐾𑐐𑐸 𑐔𑐮𑐣 𑐣𑑂𑐴𑐹𑐐𑐸 𑐏𑑅𑑋

𑐠𑐠𑐾 𑐡𑑂𑐫𑑅 𑐥𑐸𑐖𑐵 𑐫𑐵𑐫𑐾𑐧𑐮𑐫𑑂 𑐣𑐫𑐾𑐐𑐸 𑐨𑑀𑐖𑐫𑑂 𑐳𑑂𑐰𑐳𑐬𑐵 𑐎𑐠𑑃 𑐨𑑀𑐫𑑂 𑐣𑐎𑐷𑑋 𑐗𑑂𑐰𑑅𑐮𑐵𑐎 𑐦𑐾𑐟𑐸𑐣𑐵 𑐔𑑂𑐰𑑃𑐥𑐶𑐣𑑂𑐟

𑑑) 𑐕𑐳𑐬𑐵 𑐎𑐠𑑃 (𑐡𑐎𑐮𑐾 𑐴𑑂𑐣𑐵𑐥𑐵𑑃) 𑑕 (𑐘𑐵) 𑐟𑐵 𑐑𑐵𑐳𑐵 𑐟𑐫𑐵 𑐨𑑀𑐫𑑂 𑐧𑑂𑐰 𑐣𑑂𑐴𑑂𑐫𑐔𑑂𑐫𑐵𑐎𑐷 𑑋

• 𑐧𑐖𑐶 𑐣𑐶𑐎𑐫𑑂 𑐎𑐵 𑐰𑐵 𑐕𑐎𑐫𑑂 𑐎𑐵 𑐰𑐵 𑐣𑐶𑐐𑑅𑐔𑐵 𑐳𑑂𑐰𑐫𑐵𑑅 𑐟𑐫𑐵𑐧𑐷 𑑋
• 𑐳𑐮𑐶𑐏𑐫𑑂 𑐰𑐵 𑐏𑑀𑐮𑐵𑐫𑑂 𑐠𑑂𑐰𑑃 𑐮𑐸𑐫𑐵𑐧𑐷 𑑋
• 𑐟𑐸𑐎𑑄, 𑐦𑐳𑐶, 𑐨𑐸𑐟𑐶, 𑐀𑐔𑐵𑐬, 𑐎𑐰𑐵𑐦 𑐟𑐫𑐵 𑐣𑑂𑐴𑑂𑐫𑐔𑑂𑐫𑐵𑐎𑐷 𑑋 𑐠𑐸𑐎𑐷𑐫𑐵𑐟 𑐕𑐳𑐬𑐵 𑐢𑐵𑐂 𑑋

𑑒) 𑐘𑐶𑐳𑐬𑐵

• 𑐢𑑁𑐫𑐵𑐟 𑐧𑐖𑐶 𑐐𑐸𑐮𑐶 𑐫𑑅 𑐳𑑂𑐰𑐫𑐵𑑅 𑐟𑐫𑐵𑐧𑐷 𑑋
• 𑐮𑐿𑑃𑐳𑐹 𑐰𑐵 𑐮𑐿𑑃𑐎𑑂𑐰𑐵𑑅 (𑐕𑐟𑐵 𑐖𑐎)
• 𑐎𑐫𑐾𑐐𑐸 𑐰𑐵 𑐳𑐶𑐩𑑂𑐥𑐸 (𑐕𑐟𑐵 𑐖𑐎)
• 𑐦𑐶𑑃, 𑐔𑐸𑑃𑐮𑐵, 𑐀𑐔𑐵𑐬, 𑐥𑐵𑐄𑑃 𑐁𑐩𑐮𑐶 (𑐐𑑂𑐰𑑅𑐐𑐸 𑐰𑐵 𑐴𑑂𑐣𑐵𑐫𑐵 𑐟𑑅𑐐𑐸) 𑐧𑑂𑐰𑐫𑑂 𑐟𑐣𑐵𑐧𑐷 𑑋 𑐠𑐠𑐾 𑐟𑐣𑐵𑐧𑐷𑐐𑐸 𑐫𑐵𑐟 𑐘𑐶𑐳𑐬𑐵 𑐢𑐵𑐂𑑋

𑑓) 𑐳𑑂𑐰𑐳𑐬𑐵

• 𑐢𑑁𑐫𑐵𑐟 𑐧𑐖𑐶 𑐐𑐸𑐮𑐶 𑐫𑑅 𑐳𑑂𑐰𑐫𑐵𑑅 𑐟𑐫𑐵𑐧𑐷 𑑋
• 𑐢𑑁 𑐰 𑐩𑐬𑐶 𑐕𑐟𑐵
• 𑐳𑐶𑐳𑐵𑐧𑐸𑐳𑐵 𑐮𑐿𑑃, 𑐎𑐫𑐾𑐐𑐸 (𑐦𑑂𑐰𑐫𑐵𑐟𑑅𑐐𑐸)
• 𑐀𑐫𑐾𑐮𑐵 (𑐣𑐶𑐎𑑂𑐰𑑅)
  𑐠𑐠𑐾 𑐟𑐣𑐵𑐧𑐷𑐐𑐸 𑐫𑐵𑐟 𑐳𑑂𑐰𑐳𑐬𑐵 𑐢𑐵𑐂 𑑋 𑐀𑐫𑐮𑐵𑑅 𑐟𑐫𑐾 𑐴𑐮𑐎𑐶 𑐨𑑀𑐫𑑂 𑐳𑐶𑐢𑑅𑐐𑐸 𑐖𑐸𑐂 𑑋

𑐠𑐸𑐎𑐠𑑃 𑐡𑐹𑐐𑐸 𑐑𑐵𑐳𑐵 𑐟𑐫𑐵 𑐣𑐎𑐷𑐐𑐸 𑐨𑑀𑐫𑑂 𑐰 𑐮𑐿𑐎𑐵 𑐖𑐸𑐂𑐐𑐸 𑐟𑐬𑐶𑐎𑐵 𑐩𑐾𑐩𑐾𑐐𑐸 𑐨𑑀𑐫𑑂 𑐧𑐮𑐾𑐣𑑃 𑐀𑐣𑐸𑐎𑐬𑐞 𑐫𑐵𑐂𑑋 𑐄𑐎𑐾𑑃, 𑐕𑐸𑑃 𑐥𑐸𑐖𑐵 𑐩𑐖𑐸𑐂 𑐧𑐮𑐾 𑐣𑐎𑐷𑐐𑐸 𑐨𑑀𑐫𑑂 𑐫𑐵𑐟 𑐳𑐵𑐢𑐵𑐬𑐞 𑐨𑑀𑐫𑑂 𑐢𑐵𑐂𑑋

𑐣𑐾.𑐳𑑄.𑑑𑑑𑑔𑑓.𑑑𑑓.𑑗 (𑐳𑐣𑐶𑐰𑐵𑑅)

𑐮𑐶𑐢𑑃𑐳𑐵 –
𑐟𑐸𑐮𑐵𑐢𑐬, 𑐟𑐵𑐬𑐵𑐡𑐾𑐰𑐷 (𑐣𑐾.𑐳𑑄. 𑑑𑑑𑑓𑑑) 𑑋 𑐠𑐵𑐫𑑂 𑐨𑐸 – 𑐨𑑀𑐫𑑂 𑐖𑑀𑐮𑑃𑐫𑐵 𑐰𑐶𑐰𑐬𑐞 𑐕𑐸𑐳𑐶𑑄𑐳𑑂𑐫𑐵𑐬, 𑐫𑐾𑑃,
𑐣𑐾𑐥𑐵𑐮𑐩𑐞𑑂𑐜𑐮
𑐳𑐵𑐫𑐩𑐶, 𑐳𑐣𑑂 (𑐣𑐾.𑐳𑑄. 𑑑𑑑𑑔𑑒)𑑋 𑐩𑑀𑐴𑐣𑐶 𑐣𑐏𑑅 , 𑐣𑐾𑐥𑐵𑐮𑐨𑐵𑐳 𑐚𑐵𑐂𑐩𑑂𑐳, 𑐫𑐾𑑃, 𑐣𑐾𑐥𑐵𑐮𑐩𑐞𑑂𑐜𑐮