Nepah National Party polled ahead of major parties despite its candidates losing

नेरापाया उम्मेदवारत बूसाँ, प्राप्त मत अनुसार ततःधंगु पार्टित सिबे च्वयेलाः

ने सं ११२८ चिल्लागा ९ (नवःमी) सोमवाः
विभिन्न राजनैतिक पार्टी विभाजित नेवाः भोटँ पराजित नेवाःत छगु जुनि छकः जक प्राप्त जूगु मौका नेवाःतेसँ गुमेयात। वंगु बिहिवाः अप्रिल १० तारिक कुन्हु जूगु संविधान सभा निर्वाचनय्, नेपाः राष्ट्रीय पार्टिया उम्मेदवार ६ (खु) म्हे छम्हेसिनँ हे चुनावय् त्याके मफुत। नेवाः उम्मेदवारत संविधान सभाय् दुतछ्वया, न्हूकथँ देःकीगु संविधाने नेवाःतेगु अधिकारयात संरक्षन व उत्थान यायेगु ज्यायाय फइगु आसायाना च्वँपिँ गुलिनँ देसवासी नापँ विदेसवासी नेवाःतेगु लागी थुगुसियागु निर्वाचनया परिणाम तसकँहे म्हाइपुसे च्वंगु जक मखुसे नेवाःतेगु भविष्य छुजुइधैगु हे धाय मफइगु कथँ ग्यानापुसे च्वँ। खःजा २३९ दँ न्ह्यवः पृथ्वी नारायण शाहनँ नेपाःयात आक्रमण यावःबले, गोर्खाली आक्रमणकारि फौजया बन्दुकया गोलियात, नेवाःतेसँ मरीँ केःकूगुखँ स्यूपिसँ न्हिला सिधेकीथेँ, थुगुसिया नेवाःतेगु असफलतायात, अपायच्वः धन्दाकयानँ छुयायगु धाइपिँ नेवाःपासापिँ हे आपा दूगु खना झी नेवाः परिवारया अपायच्वः न्ह्याइपु मता। अएनँ, निर्वाचनया परिणाम विश्लेषण याना स्वयबले, नेवाःतेगु एःकता न्हापासिबे गाक्कँहे बल्लाना वया च्वंगुदु धायमा। नेरापाया उम्मेदवारत थूगु संविधान सभा निर्वाचनँ बूसाँ, येँ व यले, नेपाःया ततःधंगु पार्टित सिबे अपो मत कया प्येन्गूगु थासय थाहाँ वःगु दु। थथे बल्लना वयाच्वंगु एःकता भविष्ये आसिबे बल्लनावइगु आसायायफुनि।

दकले अपो नेवाः मत कया दीपिनिगु नाँ धल कथँ, नापँ थःगु क्षेत्रे प्राप्तयाना कायफूगु थाय स्वयबले, नेरापाया भविष्य बाँहेलाइतिनि।
नेरापाँ दँपिँ उम्मेदवार – कुर्कूगु मत – थःगु क्षेत्रे प्राप्तजूगु थाय
१) येँया निर्वाचन क्षेत्र नं ८, नरेश वीर शाक्य – ३९७५ मत – रापपा, रापपा (नेपाल), राजपा सिबे अपो मतकया प्येन्गूगु थासय
२) यल निर्वाचन क्षेत्र नं २, पुष्प रत्न शाक्य – २३६० मत – रापपा, रापपा (नेपाल), राजपा, नेकिमपा, जनमोर्चा सिबे अपो मतकया प्येन्गूगु थासय
३) येँया निर्वाचन क्षेत्र नं ७, विजय प्रकाश सैजु – २१३५ मत – रापपा, रापपा (नेपाल), राजपा, नेकिमपा, नेकपा (माले), सिबे अपो मतकया प्येन्गूगु थासय
४) येँ निर्वाचन क्षेत्र नं ६, सुवर्ण केसरी चित्रकार – १३२० मत – रापपा, रापपा (नेपाल), राजपा, नेकिमपा, नेकपा (माले), नेकपा (एकीकृत), सिबे अपो मतकया प्येन्गूगु थासय
५) यल निर्वाचन क्षेत्र नं ३, धन भक्त शाक्य (लुमन्ती) – १२६२ मत – रापपा, रापपा (नेपाल), राजपा, नेकिमपा, नेकपा (माले), नेकपा (एकीकृत), सिबे अपो मतकया प्येन्गूगु थासय
६) येँ निर्वाचन क्षेत्र नं १०, विष्णु प्रसाद श्रेष्ठ – ३०० मत – नेकपा (माओवादी), एमाले, कान्ग्रेस, रापपा, रापपा (नेपाल) या क्वसँ मत कया ६ थाय प्राप्तयाना कायफत।

अले झीगु ७५ जिल्लाय नेरापायात मतदान यागु जिल्ला दथुइ दकले अपो येँ निर्वाचन क्षेत्र नं ८ ठे ६२७७ मत; दकले म्हो महोत्तरी जिल्लाय १ मत खः। दकले मछासे च्वंगुला यल निर्वाचन क्षेत्र नं २, व नं ३ या परिणाम – निगुलिँ ० – ० मत। अयनँ, यल निर्वाचन क्षेत्र नं १ या समानुपातिक परिणाम पिहाँमवःनिगुलिँ, थ्व मिलेमजूगु तथ्याङक जुयेमा धका आसयान च्वना।

थ्व खँ पोष्ट याना च्वच्वँ नेकपा माओवादिँ १०४, कांग्रेस ३०, एमाले २४, मधेशी जनाधिकार फोरम १५ सीट त्याकूगु बुखँ न्यनेदु। थुकिया परिणाम छु जुइ बिचा याय बहजु। मत गणना जुयातुँ च्वनतिनि।