Nepal’s National New Year celebration in Washington D.C. honours Poet Durga Lal

Washignton D. C. – Nepalese here celebrating the Nepal’s 1129th New Year amid hundreds of residents in and around the D. C. led by Ambassador Dr. Sureshchandra Chalise honored Poet Durga Lal Shrestha for his contribution to Nepal’s Bilingual literature. Poet Durgalal known as Janakavi (People’s Poet), born in Kathmandu has hundreds of poem, songs, novels and short stories written in both Nepalese languages of Nepal Bhasa and Khasa Bhasa to his credit. More in Nepal Bhasa.

अमेरिकाय् नेपाल संवत झःझः धायेक हना, जनकवि दुर्गालालयातः अभिनन्दन यातः

वसिंङटन डीसी, अमेरिका – थनया नेवा अर्गनाइजेशन अफ अमेरिकाँ नेपाल संवत ११२९ या लसताय् झःझःधायेक हंगु न्हूँदँ ज्याझ्वलँ जनकवि दुर्गालाल श्रेष्ठयातः अभिनन्दन यातः। जनकवि दुर्गालाल श्रेष्ठँ, अमेरिकाय् वयाःनं नेपाल संवत हनेदयाः थः आपालँ लयतागु खँ धइदिसे, नेपाल संवतयातः राष्ट्रीय संवतया मान्यता दयेमाः धकाः आन्दोलन याःपिँ दथुई थःनँ दुथ्याःगु खँ कनादिल। ३१ (स्वीछ) दँ न्हापाँनिसेँ सुरुयाःगु आन्दोलन थउँ सफल जूगुलिँ थः तस्कँहे लयताःवः धका धइदिल। नापँ अमेरिकाय् थथे थःतः सम्मान याइगु म्हगसेहे मखना धइदीसे, थुज्वःकथँया सम्मानया भारी गथेयाना क्वबिया यंके फई बिचाः याये मफुनिसाँ, अमेरिकाथेँ जाःगु देःसेनं थथे नेपाःमिपिसँ थःगु सम्मान यानादीगुयातः लसता प्वंका दिल।

मेरिलण्डया सिल्वरस्पिङगे शनिवाः सन्ध्याइले जूगु थ्व न्हूँदँया ज्याझ्वय् नेवा अर्गनाइजेशन अफ अमेरिकाया पाखेँ अध्यक्ष राजेश श्रेष्ठ जक मखुसे डीसी क्षेत्रया मेमेगु नेपाःमि संघ संस्थानं जनकवि दूर्गालाल श्रेष्ठयातः अभिनन्दन पौ लःल्हागु दु। व संस्थात व प्रतिनिधिपिँ थथे खः, अमेरिका नेपाल सोसाइटिया पाखेँ अध्यक्ष विष्णुकुमारी थापा, नेपाल अमेरिका पत्रकार संघया पाखेँ अध्यक्ष गिरीश पोखरेल, प्रेस नेपालया प्रधान सम्पादक शास्वत पराजुली, अन्तर्राष्ट्रीय नेपाली साहित्य समाज डीसी च्याप्टरया पाखेँ अध्यक्ष गोविन्द गिरी प्रेरणा, अमेरिका नेपाल वीमेन्स एसोसिएसनया पाखेँ रीता तिवारी, खसखस डटकमया पाखेँ बासु श्रेष्ठ, नेपाल होराइजन्स् डटकमया सुवुप्रताप केसी, पासापुचः अमेरिकाया लक्ष्मण प्रधान, रेडियो दोभानया अध्यक्ष नगेन्द्र पौडेल, ओरेगन नेपाल कमिटिया दया शाक्य, अमेरिकाय् ताहाई च्वना वइच्वम्ह डा. सुकदेव साह व विश्व सन्देशया पाखेँ हेमन्त श्रेष्ठपिसँ जनकवि दुर्गालाल श्रेष्ठयात सम्मान याना दिल।

न्हूँदँ ज्याझ्वया मूपाहाँ, नेपाःयाम्ह राज्यदूत डा. सुरेशचन्द्र चालिसँ न्हूँदँया भिन्तुना देछाना दिसे, थउँ तक्क नेपाःया मेमगु भासाया दथुइ संयुक्त राष्ट्रसंघेहेनं मान्यता प्राप्त जूगु भास नेपाल भास हे खः। प्रजातन्त्र व सांस्कृति शसक्तिकरण छगु मेगुनापँ गाँसे जुयाच्वंगु दु धइदिसे, थुज्वगु संघ संस्थातेसँ झी सकल नेपाःमिपिन्तः एकताया सूत्रे स्वाकातःगु दु धका धइदिल। राज्यदूत चालिसेँ “अमेरिकाय् हे नेपाःया संस्कृति छिकपिनिगु पाखेँ सुरक्षित जुयाच्वगु खनाँ लयता” व धइदिसे, थुज्वःगु ज्याझ्व आइक्यँनं थ्व सिबे बाँलाक्क बःलागुकथँ यायेफयेमा धका राष्ट्र संवत नेपाल संवतया न्हूँदँया भिन्तुना देछाया दिल।

Newah Organization of America organized the 1129th Nepal New Year celebration in Washington D. C.

ज्याझ्वया मेम्ह पाहाँ, कलाकार मदनकृष्ण श्रेष्ठँ नेपाल थीथी जातजाति भास भासीत सकसिया साझा देः धका धइ दिसे, जातजाति पतिकँयागु नखःचखः मेमेगु जातजातिँनं छखलः मेखलः नापँ मिले जुया हँसा बाँलाइगुलिँ अथेयायेतः ईनाप यानादिल। कलाकार श्रेष्ठँ जनकवि दुर्गालाल श्रेष्ठयातः सम्मान याःगु संघसंस्थातनं सम्मानित जूगु दु धका धइदिल।

ज्याझ्वः ग्वसाखलः नेवा अर्गनाइजेशनया अध्यक्ष राजेश श्रेष्ठँ जनकवि दुर्गालाल श्रेष्ठयात अभिनन्दन पत्र व कलाकार मदनकृष्ण श्रेष्ठयातः कदर प्रत्र लःल्हाना दिसे, थःपिसँ दयेकागु टेलिश्रृंखला “१५ गते” यातः समेत जनकवि श्रेष्ठँ च्वयादीगु “सय थरी बाजा..”या म्ये दुथ्याःगु खँ कनादिसे, वयकःथेँ जाम्ह म्येच्वमि आतक्क नाप मलानि धइदिल।

नेपाल संवतया बारे, NOAया संस्थापक अध्यक्ष वेद प्रधान व मेम्ह दुजः डा. महेश्वर अमात्यँ नेपाल संवत व मेमेगु संवतया बारे स्लाइड् शो केनादिल। नापँ, संस्थाया संस्थापक त्रिभुवन तुलाधरँ न्हूदँया भिन्तुना हसना, आदित्यमान श्रेष्ठँ योग व साधानाया बारे नवानादिल धाःसा, सृजन ताम्राकारँ जनकवि दुर्गालाल श्रेष्ठया बारे ९ (गु) मिनेट ताहाकःगु वृक्तचित्र केना दिल।

ज्याझ्वःया निगूगु चरणे, डीसीया मचामस्त व मेमपिँ नेपाःमि कलाकारपिसँ थःथःगु नृत्य नापँ म्ये न्ह्यथना दिल। उकीहे, कलाकार मदन कृष्ण श्रेष्ठँ “खोलावारी खोला पारी” म्ये हालादिल। अले कलाकार संजीव प्रधान, सृजन ताम्राकार, योग्यमान शाक्य, समीर मानन्धरपिसँ थःथःगु कला प्रस्तुत यानादिल।

वहे ज्याझ्वले, दया शाक्यँ च्वया दीगु नेपाल भास विज्ञान सफू “वया प्वाथय् दु” जनकवि दुर्गालाल श्रेष्ठया पाखेँ विमोचन जुल। गौतम दाहालँ न्ह्याकादीगु थ्व ज्याझ्वःले ३ (स्वसः)म्हँ मयाक्क नेपाःमिपिनिगु उपस्थिति दूगु खः। – The Newah

बुखँ व किपाः सुभाय् – दया शाक्य व प्रेस नेपाल
मेगु किपाःत स्वयेतः थन क्लिक् यानादिसँ। अले छिगु कमेन्ट् थन क्वसँ च्वयादिसँ The Newah)

2 thoughts on “Nepal’s National New Year celebration in Washington D.C. honours Poet Durga Lal”

  1. जनकवि दुर्गालालजु व कलाकार मदन कृष्णजु थेँ जापिँ व्यक्तित्वपिनिगु कुतलँ झीगु नेपाल देसे साम्प्रदायिक सद्भाव ल्यनाँ च्वंगु दु धायेमाः। शासक वर्गंतेसँ नेपाःयागु छगु जाति मेगु जाति नापँ ल्वाका न्ह्याबँलेनँ शासन याना च्वंगु दु। जनकवि दुर्गालाल श्रेष्ठं च्वयाद्यूगु म्ये “सय् थरि बाजा एऊटै ताल….” धात्थेँ साम्प्रदायिक सद्भाव व राष्ट्रीय एकतायागु प्रतीक ख। अले, “१५ गते” टेलिफिल्म यागु मार्फत मदन कृष्ण श्रेष्ठजुँ बियाद्यूगु “अन्तर्जातिय/अन्तर्सामुदायिक” विवाह यागु खँनं एकदम आवश्यक खँ ख:। जातीय भेदभाव याइगु “बाहुनवाद” यागु विकल्प झीसँ व झीगु समाजया दुनेँ च्वँपी सकसिनँ भाजु मदनकृष्ण यागु हसना (सन्देश) यात जीवनदर्शन दयेकेमाः थेँ च्वँ।

    अले दया शाक्यजुँ च्वयाद्यूगु नेपाल भास विज्ञान ब्वनेगु ईच्छा दु। गथेयाना ल्हातेलाके फईथेँ धयादिसँ।

    नेपाल भास च्वयेबले भचा थाकुनि। अनलाईन डिक्शनरी छुँ दुलाथेँ, छकः धयादिसँ।

    सुभाय् !

    सुरेश,
    टोक्यो
    (झी द नेवाःया पासापिँ, सुरेशजुयागु न्ह्यसःया लिसः दुसा, न्ह्यामसिननं लिस बिये ज्यू। – The Newah)

Leave a Comment

Your email address will not be published. Required fields are marked *