Nepal, a reflection of Nepal Bhasa, Newah culture and its civilization

Nepal is a reflection of of Nepal Bhasa, Newah culture and its civilization. We should proudly move forward together as one nation. So said Mr. Bhaskar Rajkarnikar, vice president of Nepal Chamber of Commerce and Chairman of Avenues Television of Kathmandu at a reception held yesterday evening in Tokyo in his honour. The reception was organized by Newah Jagaran Manch Japan. More in Nepal Bhasa.

ने.सं. ११२९ तछला ११ बिहिवाः

तोःक्योः – नेपाल भास, नेवा: संस्कृति व नेवा: सभ्यता धइगु हे नेपाल खः। उकेँ सकल नेपाःमित छथ्वःजुया झी नेपाःमि धका गर्वजुया न्ह्यावने फयेकेमा। जपान भ्रमणे झायादीम्ह, नेपाल उध्योग बाणिज्य महासंघया नकू नापँ अभिन्युज टेलिविषनया महाप्रबन्धक भास्कर राज कर्णिकारजु यात लसकुस यायेगु ज्याझ्वले नवानादिसे, वयकलँ अथे धया दीगु खः। थःतः याःगु लसकुस् यात सुभाय् प्वंका जपानथेँ जाःगु देसे च्वनानँ थःगु संस्कृति व देसयात छुँयाये धइगु भावनाँ मञ्च न्ह्याःवना च्वंगु न्यने दया लयतावः धकानं धयादिल।

नेवा: जागरण मन्च जपानया ग्वसाले म्हिगः सन्ध्या इले तोःक्योःया शिबुयात्वाःया एसियन् डाइनिङ हःले जूगु थ्व ज्याझ्वय् निद दुम्ह अमि शाक्यँ राजकर्णिकारजुयातः स्वाँछथ्व लःल्हाना लसकुसयासे सुरु जुल। लसकुस न्वचू बियादीम्ह, मञ्चया नकू कृष्ण बदन जोशिँ राजकार्णिकारजुयात लसकुस यायेदया लसतावःगु खँ कनाँदिसे, जपानवासी नेपाःमिते दथुइ थवँथः मैत्रिभाव क्वातुकेगु व नेपाले रोजगारि प्रशिक्षणे लगानी यायेगु मञ्चया उद्वेष्य कनादिल।

लसकुस ज्याझ्वले, थःगु खँ प्वंकेगु झ्वले, मञ्चया सल्लाहकार अनिल कुमार शाक्यँ नेपाःमित जात भात, जात जाती धकाः अल्झे मजूसे, सकल नेपाःमितेतः जागरण याना थःम्हँ फूगु गुहालि यायेगु बिचाः यायेमागु खँ प्वंकादिल। अथेहे, एन आर जपानया पुलाम्ह नायः राजन प्रधानाङ्गँ सकल नेपाःमित छत्वः छप्वायँ जुया झी नेपाःमि धका न्ह्याःवने माः धका धइदिल।

(किपाः सुभाय् – बोबी बिमोली)

बहु जातीय समाज विशेषज्ञ सुवन् वज्राचार्यँ नवानादीसे, नेपाल बहु भास बहु जातीया देस जूगुलिँ, छगु जातीँ जक राज्यया मुल प्रशासनिक, राजनीतिक नापँ न्ह्यागुँ क्षेत्र पतिकँ एकाधिकार मयासे सकल नेपाःमितेगु भावनायात सम्मानयासे समान अधिकार बीमाःगु बारे थःगु बिचाः प्वंकादीसे नेपाल धयागु तःगःगु छगः वाहन खःसा उकीया पाँग्रा तराइ, पहाड, हिमाल व नेपाल मण्डल खः। थ्व पाँग्राय् बाँलाक्क हावा दूमदु धका बाँलाक्क बिचाः यायेफुम्हेसिनँ जक नेपाल धइगु वाहन न्ह्याकायंके फइ धका धयादिल।

मञ्चया दाँभरि जनक राज शाक्यँ, राजकर्णिकारजुयात लसकुसयायेगु नापँ नेवा:जागरण मञ्चया ग्वसाले, बैरेनी व कल्लेरी गा बि स स्वाइगु यातायाता पूल दयेके तेनागु खँ कनादिसे थउँकन्हे इन्जिनीयरया पाखेँ जुइमागु सर्भे जुइसिधःगु जानकारी बियादिल।

राजकर्णिकारजुया लसकुस यायेगु झ्वःले मञ्चया नायः सुनिल कुमार शाक्यँ सुभाय् देछासे राजकर्निकारथेँ जाम्ह उध्योगी बुद्विजिवीपिनिगु बिचाः न्यनेदया थः तसकँ प्रभावित जूगु खँ कनादिसे, नेवाः जागरण मञ्चया उद्देष्यया बारे विस्तृतकथँ नवाना दिल। नेवा: जागरण मञ्चँ नेवा:तेत जक मखुसे सकल नेपामितेतहे मागु फूगु गुहालियायेगु ऊद्देष्यदूगु खँनं कना दिल।

उमेश सुवाल, गेहेन्द्र बज्राचार्य, बोबी बिमोली, सागर घिमिरे, पुस्कर राजकर्णिकार, प्रदिप श्रेष्ठ, स्याम तन्डुकार, उपेश श्रेष्ठ पिसँनँ थःथःगु परिचय बियादिसे राजकर्णिकारजुयात नापलाय् दूगु लसताया खँ प्वंकादीगु थ्व ज्याझ्वः मञ्चया नकू कृष्ण बदन जोशीँ टोस्ट् यासे नेवाः भ्वय् नयेगु सुरु जुल।

छिगु कमेन्ट् च्वयेतः थन लाइन् क्वसँया “Comments ” तियादिसँ।