Nepal’s reinstated national new year celebrated pomp and pagent amidst “national media” over looking even the event attended by the Prime Minister

* प्रधानमन्त्रिहे मुपाहँ जूसाँ न्हूँदँया बुखँ नेपाःया राष्ट्रीय स्तरया पत्रपत्रिकाँ बहिस्कार
* नेपाल मण्डलया येँ, यल, थिमि नापँ थीथी थासय् नेपाल देसया राष्ट्र संवत नेपाल संवत हन
* नेपाली काँग्रेसया नेताया आदिवासि जन आकंक्षा विरोधी भाषण
– थथे हन थुगुसी नेपाल देसया राष्ट्र संवत नेपाल संवत –

*नेपाल मण्डलया येँ, यल, थिमि नापँ थीथी थासय् नेपाल देसया राष्ट्र संवत नेपाल संवत हनेगु ज्या
हलिमे गुलिनँ संवत दु, नेपाःया नेपाल संवतथेँ देसया नाँयात गौरवकथँ दयेकातःगु संवत जिँ स्यूथेँ गनँ हे मदु। देस जनयातः ऋणँ मुक्तयाना ब्यूम्ह छम्ह उदारवादी नेपाःमिया गौरवय् पलिस्था जूगु नेपाल संवत झी सकसिगु गौरव धइगु खँ धया च्वने म्वाले धुंकलथेँहे ताः। दँयदँसँ हनावयाच्वंगु न्हूँदँया दकले तःजिगु ज्याझ्वः थुगुसीनँ नेपाल मण्डलया, येँ लायकुली देसया नायः प्रधान मन्त्री माधव कुमार नेपालया मूपाहाँकथँ, नेपाल भास मंका खलःया नायः, मानवआधिकारवादि एवं जननायः पद्मरत्न तुलाधर व न्हूँदँ समारोह समितिया नायः एवं सभासद तिर्थराम डंगोल पिनिगु नेतृत्वय् थीथी बाजागाजा नापँ द्वलँद्वः सज्जनतेयगु ब्वती सम्पन्न जुल।

मूपाहाँ प्रधान मन्त्रीँ माधवकुमार नेपालँ नेपाःया सकल नेपाःमितेतः न्हूँदँया भिन्तुना देछानादिसे “नेपाल संवत नेपाले, छम्ह नेपाःमिँ पलिस्था याःगु नेपाःया ऐतिहासिक व मौलिक संवत् जूगुलिँ थुकीया जगेर्ना व सम्बर्द्धन झी सकलेँ मिलेजुया यायेमाः” धका धयादीसे नेपाल संवत छ्येलेगु लागी छगु विशेष समिति गठन यायेगु, अध्ययन अनुसन्धान तथा सहलह यायेगु खँ कना दिल। खःजा थुज्वःगु प्रतिबद्धता जक मखुसे, न्ह्यनेसँ फेतुना च्वँम्ह शिक्षा व संस्कृति मन्त्री यात “का थुकीयात माःगु विशेष समिति देकी” धका पेदँ न्ह्यवःया न्हूँदँ समारोहले गिरिजा प्रशाद कोइराला अबलेयाम्ह प्रधान मन्त्रीँ ब्यूगु उजँ व अनँ दच्छिलिपायागु न्हूँदँ समारोहया मूपाहाँ जुया वहे थासय् भिन्तुना देछाःबले “ल नेपाल संवत दैनिकरुपमा व्यवहारमा ल्याउन के गर्नु पर्छ, तपाईहरुलेनै एउटा कमिटि बनाउनुस्” धका नेपाल संवतया विशेष समितियात फासाफुसुँ यानाछ्वःगु खँ न्यँपिँला छु अथे नवाम्हहे आतकँ जीवित तिनि धायेबले, प्रधान मन्त्री नेपालया थ्व प्रतिबद्धताया गुलि सत्यता दु स्वयेगु ल्यँहे दनि।

स्वीदँ न्ह्यवःनिसेँ, न्हूँदँ समारोह न्यायेका वयाच्वंगु नेपालभास मंकाः खलःया नायः तथा मानवअधिकारवादी जननायः पद्मरत्न तुलाधरँ नेपाल संवतया प्रचलन यायेगु धइगुहे दासताँ मुक्ति जुइगु खः धयादिसे, “आः दयेकीगु संविधानय् नेपाल संवतयात प्रचलने हयेगु खँनँ सुनिश्चित यायेमा” धका धयादिसे अथे यायेतः माग याना दिल। पद्मदाइ पञ्चायत कालँ निसेँ नेवाःतेगु जक मखुसे नेपाःमि सकसिगु भास अधिकार, मानव अधिकार, बहुदलीय अधिकारया लागि जेल सजाँयतकँ नया नेपाःमितेगु लागि सेवा यानादिया च्वंगु खँ, धया च्वने माःगु खँ मखु। वयकःया इनिषियटिवँ थउँ राजनिती दुहाँवये धुंकूपिँ नेवाः नायःतनँ आपालँ दया वये धुंकल। थ्व धात्थेँ च्वछाये बहगु प्रवृत्ति खः नेवाःतयेगु।

थ्वहे ज्याझ्वले शंखधर साख्वा तथा नेपाल संवतया बारे दुग्यंक अध्ययन याना च्वनादीम्ह प्राध्यापक काशिनाथ तमोटयात प्रधानमन्त्रीँ न्हूदँ समारोहया इमेज विशेष पुरस्कार लःल्हानादीगु खःसा व मस्तेगु धेँधेँ बल्लाकासाय ब्वति काःपिँ मस्तयेतःनं प्रधान मन्त्री नेपालँ पुरस्कार बियादिल। काशिनाथ प्रोफेशरजुयागु अनुसन्धान, च्वसूत प्रचार प्रसार यायेगु ज्या भचा थ्वसिबे बृहतकथँ जुइमागु महशुस जुयाच्वपि आपालँ दया वये धुंकल। सम्बन्ध दुपिनिगु ध्यानाकर्षण जुयेमाःगु ई थ्यने धुंकल।
अले दकले अःखःगु ज्याखँ सुना याना च्वन धायेबले, नेवाःतेगु सब्स्कृप्शन, विज्ञापणँ चलेजुयाच्वंगु राष्ट्रीय स्तरया धका धाइगु पत्र पत्रिकाँ धाःसा प्रधान मन्त्री मूपाहाँ जूगु बुखँहे पत्रिकाया फ्रन्टपेजे तयेगुला गनँगन पत्रिकाया दुनेहे न्हूँदँया कन्हेकुन्हु जूसाँ छापेयाना आदिवासी नेवाःतेतः सद्भावना केने मफुनि। थुज्वःगु पत्रिकायात नेवाःत ग्राहक जुया च्वनेगु, लाखौँ तकाया विज्ञापन बिया च्वनेगुया अर्थ थुइकाः कायेगु ई नं थ्यंकः वयेधुंकल।

” नेपाली काँग्रेसया नेताया आदिवासि जन आकंक्षा विरोधी भाषण
न्हूँदँया झ्वले, थिमी जूगु, राष्ट्रीय विभूति शंखधर साख्वाःया प्रतिमायात स्वाँमाः क्वखायेकेगु ज्याझ्वलेनँ प्रधान मन्त्री नेपालँ राष्ट्रीय सम्वत् नेपाल संवत यात व्यवहारिककथँ छ्यलेतः यथाशीघ्र कार्यदल गठन यायेगु कबुल ल्हानादिल। राप्रपाया नायः पशुपति शम्शेर राणा, प्रकाशशरण महत, पासाङ शेर्पा एवं मानवअधिकारकर्मि एवं नेवाः देय् दबूया संरक्षक मल्ल के. सुन्दरपिसँ नवाःगु थ्वहे ज्याझ्वय् नेपाली कांग्रेस संसदीय दलया नायः रामचन्द्र पौडेलँ धाःसा जनजाति लाइनँ देकेगु संघीय देस निर्माण देस टुक्रा जुयेफु धका धाःगु खँय् झी नेवाःत नापँ जातिय शासन सहमति पिन्तः तःधंगुहे चोट् नकूगु दु।

* यले जूगु न्हूँदँ समारोह समापन
यले जूगु न्हूँदँ समारोह समापन ज्याझ्वले, नेपालभास आकाडेडमिया चान्सलर एवं संस्कृतिविद् सत्यमोहन जोशीय मूपाहाँ जुयाःदीगु ज्याझ्वले थीथी नायःतेसँ नवाना दिल धइगु बुखँ थ्यँसाँ छु नवानादिल धइगु सीमदु।

* तिसाया धर्मचक्र मण्डल प्रदर्शन
न्हूँदँया झ्वले, तिसा साहित्य पाला ललितकला क्याम्पसया ग्वसालय् बसन्तपू लायकू लागाय् ञाकःगु मण्डल प्रदर्शने थुगुसी धर्मचक्रया मण्डला प्रदर्शन यागु जुल। रतिना बज्राचार्यया संयोजकत्वय् प्रदर्शन जूगु ऊगु मण्डल अनिल महर्जनँ डिजाइन यागु जुल। न्हूदँ समारोह समिति ११३० का अध्यक्ष सभासद् तीर्थराम डंगोलँ उलादीगु ऊगु ज्याझ्वले मण्डल दयेकूपिव कलाकारतेतः प्रमाणपत्र इनाबिया दिल।

* नेवाः संजालया खय् न्यूज्
थुज्वःगु बुखँत इनाबियेत सकृय जुयाच्वँपिँ पासापिँनँ नेवाःतहे जक जुया च्वन। वयकपिसँ यानादीगु थ्व ज्याः तसकँ हे च्वचाये बहजू। नेवाःतेसँ दयेकीगु न्यूज् अज फुसा नेपाल भासँहे प्रसारण याना हइदिल धाःसा नेवाःतेसँहे नेवाःतेतः खय् भासँ न्यूस ब्वंका च्वन धका धायेके माली मखुथेँ च्वँ।

छिगु कमेन्ट च्वयेतः लाईनया क्वसँ दूगु ” comments” क्लिक यानादिसँ!