थूसी छक: अ:खतँ दान याना स्वाँया पुन्हि हनेनु।

येँ, नेपालमण्डल – भुखाय् ब्वया बुद्ध बूगु थ्व नेपालदेसया छथ्व: जनयात दुख जुया च्वंगु इलय् मेथ्व: पासापिसँ उद्धार याना च्वंगु खना छेँ दुनाव:गु स्वयागु थ्व मिखाय् मव:गु ख्वबि मचायक कुतुँ वल। थ्व ज्याय् भन्तेपिनिगु सक्रियात खनानँ श्रद्धाया स्वाँ मचायक हे झीगु नगले ह्वया च्वन। अले मचायकहे थथे मती वल।

बुद्धबूगु, वस्पोलँ बोधिज्ञान कै बिज्यागु व दुखान्तया निब्बान सुखावती भुवनय् बिज्यागु थ्व स्वंगु महान संयोग चूलागु पुन्हि – स्वाँया पुन्हि – पेन्हुकुन्हु केनीगु दु। माने ने.सं. ११३५ बछला १६ (बुद्ध संवत २५५९ वैसाख २१ गते / 2015 May 4) आ: वैगु सोमवा: कुन्हु ला:। थुकुन्हु न्ह्याबले थेँ दान, सील, भावना धैगु स्वगु पुण्यकार्य यायेगु भिंगु न्हि ख:। भन्ते गुरुमापिन्त दान यायेगु, सील पालन यायेगु व भावना (ध्यान) यायेगु अतिकन त:धंगु न्हि ख:। अयनँ थूसी नेपालय् ब्व:गु भुखाँ आपासित: दुख: जुया च्वंगु इलय् भन्ते गुरुमाँपिसँ दुख जुयाच्वँपिँ नेपा:मितेत अ:खतँ दान यासा गथे जुइ? याय् फुसा अतिकन बानलाइ धका मती व:। अले गथे यायेगुले धायबले :-

न्ह्याबलें थेंहे सुथ न्हापाँ सील प्रार्थना, बुद्धपुजायानाहे सुरु यायेगु। अयनँ पाकेगु छु धा:सा
१) भन्तेपिन्त वैगु दान ब्यक्तिगतकथँ मकासे, जाकि जुसा जाकि छगु थलय् दान याकेगु, मरी, धेवा इत्यादी थीथी थलतया दान मुंकेगु।

२) भन्ते गुरमापिनि भोजन १२ ता न्ह्यव सिधेकेगु।

३) न्हापाँहे दयेकात:गु परित्राण मण्डपय् बिज्याना विपत जूपिन्त सान्त्वना बियेगु हानँ थुज्व:गु विपत्ति मजुयेमा धका परित्राण पाठ यायेगु। छपु छपु सूत्र सिधया मेगु सूत्र पाठयाये न्ह्यव: छक:पतिकँ चिकिचाहाकलँ “भुखाय् ब्वया विपत जूपिन्त सान्त्वना बियेगु हानँ थुज्व:गु विपत्ति मजुयेमा धका परित्राण पाठ याना च्वनागु” खँ लुमंका बीगु।

४) ३:०० ता ति जुयेवँ व:गु दान, नसा त्वसा फुक्क मुंका विहारया लिक्क गनँ मापिन्त थ्व नसात्वसा धेवा दान बिया थुगुसीया स्वाँया पुन्हि क्वचायेकेगु।

थ्व ज्या दानंदान महादान जुइगु जक मखुसे बुद्ध, धम्म व संघ प्रति नेपा:मिनिगु सद्भाव आपा जुया वैगु बिना म्हो जुया वनी मखु। गुलिसिनँ धेवा, सरसामान, नसात्वसा दान विया पुण्य कमाय् याइसा झीसँ छुँभचा “बिचा दान” याना च्वना। थूसी छक: अखतँ दान याना स्वाँया पुन्हि हनेनु। य:सा, छीसाँ थ्व बिचा:या दानँ ज्या कै बिज्याहुँ / कै दिसँ।
– द नेवा: