A kind letter to WNO to help save Nepal Bhasa from endangerment

𑐣𑐾𑐥𑐵𑐮𑐨𑐵𑐳 𑐮𑑀𑐥 𑐖𑐸𑐫𑐵 𑐰𑐣𑐷𑐐𑐸 𑐥𑐵𑐏𑐾𑑃 𑐧𑐔𑐾 𑐫𑐵𑐫𑐾𑐣𑐸!

नेपालभास लोप जुया वनीगु पाखेँ बचे यायेनु!

𑐣𑐾𑐥𑐵𑐮𑐨𑐵𑐳𑐫𑐵𑐟 𑐫𑐵𑐐𑐸 𑐡𑐩𑐣 𑐰𑐶𑐬𑐸𑐡𑑂𑐢 𑐣𑐾𑐥𑐵𑐮𑐨𑐵𑐳𑐎 𑐣𑑂𑐴𑑂𑐫𑐮𑐸𑐰𑐵𑐟𑐾𑐳𑑃 𑑙𑑐 𑐡𑑃 𑐟𑐎𑑂𑐎 𑐡𑐩𑐣 𑐳𑐴𑐫𑐵𑐣𑐵, 𑐡𑐩𑐣 𑐰𑐶𑐬𑐸𑐡𑑂𑐢 𑐁𑐣𑑂𑐡𑑀𑐮𑐣 𑐫𑐵𑐐𑐸 𑐮𑐶𑐔𑑂𑐰𑐎𑐠𑑃 𑐧𑐮𑑂𑐮 𑐖𑐣𑐟𑐵𑑃 𑐮𑑂𑐫𑑅𑐐𑐸 𑐳𑐬𑐎𑐵𑐬 𑐥𑐵𑐏𑐾𑑃 𑐨𑐵𑐳𑐶𑐎 𑐳𑑂𑐰𑐟𑐣𑑂𑐟𑑂𑐬 𑐡𑐟𑑋 𑐰𑐫𑐵 𑐮𑐶𑐥𑐵 𑐄𑐧𑐮𑐾 𑐟𑐎𑑂𑐎 𑐕𑐾𑐮𑐾 𑐩𑐦𑐫𑐵 𑐟𑑀𑐟𑐵 𑐟𑑅𑐐𑐸 𑐣𑐾𑐥𑐵𑐮𑐮𑐶𑐥𑐶𑐫𑐵𑐟 𑐴𑐵𑐣𑑃 𑐕𑐾𑐮𑐵 𑐴𑐫𑐾𑐟 𑐎𑐸𑐟𑑅 𑐫𑐵𑑅𑐥𑐶𑑃 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵 𑐣𑑂𑐴𑑂𑐫𑐮𑐸𑐰𑐵𑐟𑐾𑐐𑐸 𑐎𑐸𑐟𑑅𑐫𑐵 𑐮𑐶𑐔𑑂𑐰𑐎𑐠𑑃 𑐣𑐾𑐥𑐵𑐮𑐮𑐶𑐥𑐶𑐫𑐵𑐟 𑐫𑐸𑐣𑐶𑐎𑑀𑐜𑐫𑑂 𑐂𑐣𑑂𑐎𑑀𑐜𑑂 𑐫𑐵𑐫𑐾𑐐𑐸, 𑐫𑐸𑐣𑐶𑐎𑑀𑐜𑐫𑑂 𑐕𑐾𑐮𑐾𑐖𑐷𑐐𑐸 𑐦𑐣𑑂𑐚𑑂 𑐡𑐫𑐾𑐎𑐾𑐐𑐸 𑐠𑐾𑑃 𑐖𑐵𑑅𑐐𑐸 𑐥𑑂𑐬𑐳𑑄𑐳𑐣𑐷𑐫 𑐖𑑂𑐫𑐵 𑐖𑐸𑐫𑐵 𑐔𑑂𑐰𑑄𑐐𑐸 𑐂𑐮𑐫𑑂 𑐡𑐸𑐏𑐫𑐵 𑐏𑑃, 𑐕𑐠𑑂𑐰𑑅 𑐠𑑅𑐴𑐾 𑐥𑐸𑐔𑐮𑑃 𑐣𑐾𑐥𑐵𑐮𑐮𑐶𑐥𑐶 𑐮𑐶𑐳𑐾 𑐳𑑂𑐰𑐵𑐥𑐸 𑐡𑐸𑐥𑐶𑑃 𑐧𑑂𑐫𑐎𑑂𑐟𑐶𑐟𑑂𑐰 𑐣𑐵𑐥 𑐕𑐹𑑃 𑐴𑐾 𑐳𑐴𑐮𑐴 𑐩𑐫𑐵𑐳𑐾, 𑐐𑐹𑐐𑐮𑐫𑑂 𑐣𑐾𑐥𑐵𑐮𑐨𑐵𑐳 𑐨𑐵𑐳 𑐴𑐶𑐮𑐾𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐣𑑂𑐴𑑂𑐫𑐵𑐎𑐹𑐐𑐸 𑐖𑐎 𑐩𑐏𑐸𑐳𑐾, 𑐣𑐾𑐥𑐵𑐮𑐨𑐵𑐳𑐫𑐵 𑐏𑑃𑐐𑑂𑐰𑑅 𑐔𑑂𑐰𑐫𑐾𑐟 𑐴𑐶𑐣𑑂𑐡𑐸𑐳𑑂𑐟𑐵𑐣𑐷 𑐡𑐾𑐰𑐣𑐵𑐐𑐬𑐷 𑐮𑐶𑐥𑐶 𑐕𑐾𑐮𑐾𑐐𑐸 𑐫𑐵𑐳𑐾, 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐾𑐐𑐸 𑐮𑑃𑐥𑐸 𑐴𑐾 𑐥𑐣𑐵 𑐧𑑂𑐫𑐹𑐐𑐸 𑐀𑐰𑐳𑑂𑐠𑐵 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸𑑋

𑐏𑑅 𑐨𑐵𑐲𑐶𑐎 𑐡𑐩𑐣𑐫𑐵 𑐮𑐶𑐔𑑂𑐰𑐎𑐠𑑃 𑐁𑐥𑐵𑐳𑐶𑐟 𑐣𑐾𑐥𑐵𑐮𑐮𑐶𑐥𑐶 𑐧𑑂𑐰𑐣𑐾 𑐔𑑂𑐰𑐫𑑂 𑐩𑐦𑐸𑐥𑐶𑑃𑐣𑑃 𑐡𑐸𑑋 𑐀𑐫𑐣𑑃, 𑐣𑐾𑐥𑐵𑐮𑐨𑐵𑐳𑐫𑐵 𑐁𑐢𑐵𑐬𑐴𑐾 𑐣𑐾𑐥𑐵𑐮𑐮𑐶𑐥𑐶 𑐏𑑅𑐳𑐵, 𑐠𑐸𑐎𑐷𑐫𑐵𑐟 𑐧𑐸𑐮𑐸𑑃 𑐕𑐾𑐮𑐵 𑐴𑐫𑐵 𑐔𑑂𑐰𑑄𑐐𑐸 𑐂𑐮𑐫𑑂 𑐐𑐹𑐐𑐮𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐣𑐾𑐥𑐵𑐮𑐨𑐵𑐳 𑐏𑑃𑐐𑑂𑐰𑐟 𑐔𑑂𑐰𑐫𑐾𑐟 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐾𑐐𑐸 𑐩𑐫𑐵𑐳𑐾, 𑐕𑐵𑐫𑑂 𑐡𑐾𑐰𑐣𑐵𑐐𑐬𑐮𑐶𑐥𑐶 𑐕𑐾𑐮𑐵𑐴𑐮 𑐀𑐖𑐸𑐐𑐟𑐶 𑐔𑐵𑐫𑐾𑐩𑐵𑐐𑐸 𑐏𑑃 𑐖𑐸𑐫𑐵 𑐧𑐶𑐮𑑋

𑐠𑑁𑑃𑐫𑐵 𑐣𑑂𑐴𑐹𑐐𑐸 𑐚𑐾𑐎𑑂𑐣𑑀𑐮𑑀𑐖𑐶𑐫𑐵 𑐖𑐩𑐵𑐣𑐵𑐫𑑂 𑐎𑐩𑑂𑐥𑑂𑐫𑐹𑐚𑐬𑐫𑑂 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐾𑐖𑐷 𑐢𑐸𑑄𑐎𑐹𑐐𑐸 𑐡𑐸𑑋 𑐕𑐶𑐐𑐸, 𑐖𑐶𑐐𑐸, 𑐗𑐷 𑐳𑐎𑐳𑐶𑐐𑐸 𑐎𑐩𑑂𑐥𑑂𑐫𑐹𑐚𑐬𑐫𑑂 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐵 𑐣𑐾𑐥𑐵𑐮𑐨𑐵𑐳 𑐔𑑂𑐰𑐫𑑂 𑐖𑐷 𑐢𑐸𑑄𑐎𑐹𑐐𑐸 𑐡𑐸𑑋 𑐠𑐸𑐖𑑀𑐐𑐸 𑐀𑐰𑐳𑑂𑐠𑐵𑐫𑑂 𑐳𑐹𑑃 𑐕𑐠𑑀𑐳𑐶𑐣𑑃 𑐴𑐶𑐣𑑂𑐡𑐸𑐳𑑂𑐟𑐵𑐣𑐷 𑐡𑐾𑐰𑐣𑐵𑐐𑐬𑐮𑐶𑐥𑐶 𑐴𑐾 𑐕𑐾𑐮𑐾𑐐𑐸 𑐠𑐾𑑃 𑐖𑐵𑐐𑐸 𑐊𑐎𑐥𑐵𑐎𑑂𑐲𑐶𑐎 𑐀𑐜𑐵𑐣 𑐕𑐵𑐫𑑂 𑐎𑐵𑐫𑐾 𑐩𑐵𑑅𑐐𑐸 𑐠𑐸𑐂𑐎𑐾 𑐩𑐦𑐸𑐟𑑋

Use it or lose 𑐢𑐵𑐂𑐠𑐾𑑃, 𑐕𑐾𑐮𑐾 𑐖𑑂𑐫𑐹𑐐𑐸 𑐔𑐷𑐖 𑐕𑐾𑐮𑐾𑐐𑐸 𑐩𑐫𑐵𑐟 𑐢𑐵𑑅𑐳𑐵 𑐳𑑂𑐫𑐾𑐣𑐵 𑐰𑐣𑐷, 𑐢𑑂𑐰𑐐𑐶𑐣𑐵 𑐰𑐣𑐷𑑋 𑐳𑐫𑐾𑐎𑐵𑐟𑑅𑐥𑐶𑐳𑑃 𑐳𑐫𑐾𑐎𑐾 𑐫𑑅𑐥𑐶𑐣𑑂𑐟𑑅 𑐳𑑂𑐫𑐾𑐣𑐵 𑐧𑐶𑐫𑐵, 𑐳𑐫𑐾𑐎𑐾 𑐫𑑅𑐥𑐶𑐣𑑂𑐟𑑅 𑐳𑐫𑐾𑐎𑐾𑐐𑐸 𑐩𑑁𑐎𑐵 𑐧𑐶𑐫𑐵, 𑐩𑐠𑐹𑐐𑐸 𑐠𑐸𑐂𑐎𑐵 𑐮𑑀𑐥𑐵𑐣𑑂𑐩𑐸𑐏𑐫𑑂 𑐮𑐵𑐣𑐵 𑐔𑑂𑐰𑑄𑐐𑐸 𑐗𑐷𑐐𑐸 𑐣𑐾𑐥𑐵𑐮𑐨𑐵𑐳𑐫𑐵𑐟 𑐧𑐔𑐾 𑐫𑐵𑐫𑐾𑐐𑐸 𑐧𑑁𑐡𑑂𑐢𑐶𑐎 𑐗𑐷 𑐳𑐎𑐳𑐶𑐐𑐸 𑐎𑐬𑑂𑐟𑐰𑑂𑐫 𑐩𑐏𑐸𑐮𑐵? 𑐠𑑂𑐰 𑐏𑑃𑐫𑐵 𑐧𑐵𑐬𑐾 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐣𑐵 𑐐𑐹𑐐𑐮𑐫𑑂 𑐣𑐾𑐥𑐵𑐮𑐨𑐵𑐳𑐫𑐵𑐟 𑐡𑐾𑐰𑐣𑐵𑐐𑐬𑐮𑐶𑐥𑐶 𑐕𑐾𑐮𑐾 𑐴𑐠𑐵𑐫𑑂 𑐔𑐵;𑐥𑐶𑑃 𑐥𑐵𑐳𑐵𑐥𑐶𑐣𑐶𑐐𑐸 𑐴𑐮𑐶𑑃 𑐣𑐾𑐰𑐵𑑅 𑐡𑐧𑐹𑐫𑐵 𑐣𑐵𑐫𑑅 𑐫𑐵𑐟 𑐥𑑁 𑐕𑑀𑐫𑐵, 𑐣𑐾𑐥𑐵𑐮𑐮𑐶𑐥𑐶𑐫𑐵 𑐣𑐾𑐥𑐵𑐮𑐨𑐵𑐳 𑐮𑑀𑐥 𑐖𑐸𑐂𑐐𑐸 𑐥𑐵𑐏𑐾𑑃 𑐧𑐔𑐾 𑐫𑐵𑐣𑐵 𑐡𑐶𑐫𑐾𑐟 𑐂𑐣𑐵𑐥 𑐫𑐵𑐣𑐵𑐐𑐸 𑐖𑐸𑐮𑑋 𑐄𑐎𑐷𑐫𑐵 𑐥𑑂𑐬𑐟𑐶𑐮𑐶𑐥𑐶 𑐳𑐎𑐮 𑐳𑐡𑑂𑐨𑐵𑐰 𑐥𑐵𑐳𑐵𑐥𑐶𑐣𑐶𑐐𑐸 𑐧𑑀𑐢𑐵𑐬𑑂𑐠 𑐠𑐣 𑐡𑐸𑐟𑐶𑐣𑐵𑐐𑐸 𑐡𑐸𑑋 𑐃𑐮𑑃 𑐮𑐵𑐎𑐵 𑐠𑑂𑐰 𑐥𑑁 𑐕𑐎 𑐳𑑂𑐰𑐫𑐵 𑐡𑐶𑐳𑑃𑑋

नेपालभासयात यागु दमन विरुद्ध नेपालभासक न्ह्यलुवातेसँ ९० दँ तक्क दमन सहयाना, दमन विरुद्ध आन्दोलन यागु लिच्वकथँ बल्ल जनताँ ल्यःगु सरकार पाखेँ भासिक स्वतन्त्र दत। वया लिपा उबले तक्क छेले मफया तोता तःगु नेपाललिपियात हानँ छेला हयेत कुतः याःपिँ न्हू पुस्ताया न्ह्यलुवातेगु कुतःया लिच्वकथँ नेपाललिपियात युनिकोडय् इन्कोड् यायेगु, युनिकोडय् छेलेजीगु फन्ट् दयेकेगु थेँ जाःगु प्रसंसनीय ज्या जुया च्वंगु इलय् दुखया खँ, छथ्वः थःहे पुचलँ नेपाललिपि लिसे स्वापु दुपिँ ब्यक्तित्व नाप छूँ हे सहलह मयासे, गूगलय् नेपालभास भास हिलेगु ज्या यायेगु न्ह्याकूगु जक मखुसे, नेपालभासया खँग्वः च्वयेत हिन्दुस्तानी देवनागरी लिपि छेलेगु यासे, नेपाललिपि छेलेगु लँपु हे पना ब्यूगु अवस्था जुया च्वंगु दु।

खः भाषिक दमनया लिच्वकथँ आपासित नेपाललिपि ब्वने च्वय् मफुपिँनँ दु। अयनँ, नेपालभासया आधारहे नेपाललिपि खःसा, थुकीयात बुलुँ छेला हया च्वंगु इलय् गूगलय् दुथ्याकेगु नेपालभास खँग्वत च्वयेत नेपाललिपि छेलेगु मयासे, छाय् देवनागरलिपि छेलाहल अजुगति चायेमागु खँ जुया बिल।

थौँया न्हूगु टेक्नोलोजिया जमानाय् कम्प्यूटरय् नेपाललिपि छेलेजी धुंकूगु दु। छिगु, जिगु, झी सकसिगु कम्प्यूटरय् नेपाललिपि छेला नेपालभास च्वय् जी धुंकूगु दु। थुजोगु अवस्थाय् सूँ छथोसिनँ हिन्दुस्तानी देवनागरलिपि हे छेलेगु थेँ जागु एकपाक्षिक अडान छाय् काये माःगु थुइके मफुत।

Use it or lose धाइथेँ, छेले ज्यूगु चीज छेलेगु मयात धाःसा स्येना वनी, ध्वगिना वनी। सयेकातःपिसँ सयेके यःपिन्तः स्येना बिया, सयेके यःपिन्तः सयेकेगु मौका बिया, मथूगु थुइका लोपान्मुखय् लाना च्वंगु झीगु नेपालभासयात बचे यायेगु बौद्धिक झी सकसिगु कर्तव्य मखुला? थ्व खँया बारे ध्यानाकर्षण याना गूगलय् नेपालभासयात देवनागरलिपि छेले हथाय् चा;पिँ पासापिनिगु हलिँ नेवाः दबूया नायः यात पौ छोया, नेपाललिपिया नेपालभास लोप जुइगु पाखेँ बचे याना दियेत इनाप यानागु जुल। उकीया प्रतिलिपि सकल सद्भाव पासापिनिगु बोधार्थ थन दुतिनागु दु। ईलँ लाका थ्व पौ छक स्वया दिसँ।