𑐧𑑁𑐡𑑂𑐢 𑐢𑐿𑐥𑐶𑑃 𑐳𑐸 𑐏𑑅? 𑐐𑑀𑐩𑑂𑐴𑐾𑐳𑐶𑐣𑑃 𑐖𑐣𑐐𑐞𑐣𑐵𑐫𑑂 𑐠𑑅𑐟 𑐧𑑁𑐡𑑂𑐢 𑐢𑐎𑐵 𑐔𑑂𑐰𑐫𑐾𑐎𑐵?

– 𑐳𑐵𑐐𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫

𑐗𑐷𑐳𑑄 𑐠𑑅𑐟 𑐧𑑁𑐡𑑂𑐢 𑐢𑐎𑐵𑑅 𑐢𑐫𑐵 𑐰𑐫𑐵𑐔𑑂𑐰𑐣𑐵𑑋 𑐀𑐫𑐣𑑃 𑐧𑑁𑐡𑑂𑐢 𑐢𑐿𑐐𑐸 𑐕𑐸 𑐏𑑅𑐮𑐾 𑐠𑑂𑐰 𑐏𑑃 𑐧𑐵𑑄𑐮𑐵𑐎 𑐩𑐳𑐶𑐂𑐎𑐵 𑐰𑐣𑐵 𑐔𑑂𑐰𑑄𑐐𑐸 𑐡𑐸𑑋 𑐗𑐷𑐐𑐸 𑐡𑐾𑐳𑐫𑐵 𑐖𑐣𑐐𑐞𑐣𑐵𑐫𑑂 𑐧𑑁𑐡𑑂𑐢𑐟𑐾𑐐𑐸 𑐖𑐣 𑐮𑑂𑐫𑐵𑑅 𑐐𑐸𑐮𑐶 𑐡𑐸 ? 𑐖𑐣𑐐𑐞𑐣𑐵 𑐰𑑅𑐧𑐮𑐫𑑂 𑐐𑐸𑐮𑐶𑐳𑐶𑐣𑑄 𑐖𑐶 𑐧𑑁𑐡𑑂𑐢 𑐢𑐎𑐵𑑅 𑐔𑑂𑐰𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵? 𑐗𑐷𑐳𑑃 𑐠𑑅𑐟𑑅 𑐠𑑅𑐩𑑂𑐴𑑃 𑐣𑑂𑐴𑑂𑐫𑐳𑑅 𑐟𑐫𑐾𑐩𑐵𑐐𑐸 𑐀𑐰𑐳𑑂𑐠𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸𑑋

𑐐𑐸𑐮𑐶𑐏𑐾 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑐳𑑃 𑐠𑑅 𑐰𑐖𑑂𑐬𑐵𑐔𑐵𑐬𑑂𑐫 𑐏𑐫𑐵𑑄 𑐣𑑄 𑐄𑐎𑐸𑐣𑑂𑐴𑐸𑐫𑐵 𑐖𑐣𑐐𑐞𑐣𑐵𑐫𑑂 𑐠𑑅𑐟 “𑐴𑐶𑐣𑑂𑐡𑐸” 𑐢𑐎𑐵 𑐔𑑂𑐰𑑅𑐥𑐶𑑄 𑐡𑐸 𑐢𑐵𑐂𑑋 𑐗𑐷𑐳𑑄 𑐠𑑅𑐟 𑐠𑑅𑐩𑑂𑐴𑑄 𑐩𑑂𑐴𑐩𑐳𑐶𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐕𑐐𑐹 𑐀𑐖𑑂𑐘𑐵𑐣𑐟𑐵𑐫𑐵 𑐥𑐎𑑂𑐲 𑐟𑐎𑑄 𑐖𑐸𑐫𑐵 𑐰𑑂𑐫𑐹𑐐𑐸 𑐡𑐸𑑋 𑐡𑐾𑐳𑐫𑐵 𑐟𑐠𑑂𑐫𑐵𑑄𑐎𑐫𑑂 𑐧𑑁𑐡𑑂𑐢 𑐢𑐫𑐵𑐥𑐶𑑄 𑐩𑐸𑐎𑑂𑐎𑑄 𑑘% 𑐥𑑂𑐬𑐟𑐶𑐱𑐟 𑐖𑐎 𑐡𑐸 𑐢𑐫𑐵𑐟𑑅𑐐𑐸 𑐡𑐸 𑑋 𑐗𑐷 𑐧𑑁𑐡𑑂𑐢𑐟 𑐢𑐵𑐟𑑂𑐠𑐾𑑃 𑑘% 𑐖𑐎 𑐏𑑅𑐮𑐵? 𑐢𑐎𑐵𑑅 𑐗𑐷𑐳𑑃 𑐣𑑂𑐴𑑂𑐫𑐳𑑅 𑐟𑐫𑐾 𑐩𑐵𑐐𑐸𑐡𑐸𑑋 𑐧𑑁𑐡𑑂𑐢𑐟𑐾𑐐𑐸 𑐖𑐣𑐐𑐞𑐣𑐵𑐫𑐵 𑐳𑐬𑐎𑐵𑐬𑐷 𑐟𑐠𑑂𑐫𑐵𑑄𑐎 𑐟𑐳𑐎𑑄 𑐴𑐾 𑐐𑐮𑐟 𑐖𑐹𑐐𑐸 𑐡𑐸 𑑋 𑐗𑐷 𑐰𑐖𑑂𑐬𑐵𑐔𑐵𑐬𑑂𑐫𑐟𑐾𑐐𑐸 𑐩𑑂𑐴𑐮𑑂𑐫𑐵𑑅 𑐐𑐸𑐮𑐶 𑐡𑐸 ? 𑐱𑐵𑐎𑑂𑐫𑐟 𑐐𑐸𑐮𑐶 𑐡𑐸?𑑋 𑐧𑑁𑐡𑑂𑐢 𑐖𑐵𑐟𑐶𑐟 𑐖𑐎 𑐐𑐸𑐮𑐶 𑐡𑐸? 𑐖𑐵𑐟𑐶𑐐𑐟 𑐎𑐠𑑃𑐮𑐵 𑐜𑐵𑐚𑐵𑐟 𑐥𑐶𑐎𑐵𑐐𑐸 𑐡𑐸 𑑋 𑐖𑐵𑐟𑐶𑐐𑐟 𑐎𑐠𑑃 𑐖𑐎 𑐳𑑂𑐰𑐫𑐵𑐰𑐣 𑐢𑐵𑑅𑐳𑐵 𑐧𑑁𑐡𑑂𑐢𑐟 𑑗𑑕% 𑐖𑐸𑐫𑐾𑐩𑐵𑑋 𑐩𑐾𑐥𑐶𑐣𑑂𑐳𑑄 𑐠𑑅 𑐳𑐸𑐢𑐎𑐵 𑐩𑑂𑐴𑐩𑐳𑐶𑐫𑐵 𑐠𑑅𑐟𑑅 “𑐴𑐶𑐣𑑂𑐡𑐸” 𑐔𑑂𑐰𑐎𑐮 𑐖𑐸𑐂𑐦𑐸 𑑋 𑐖𑐵𑐟𑐶𑐐𑐟 𑐎𑐠𑑃 𑐖𑐎 𑐢𑐵𑐫𑐐𑐸 𑐏𑑅𑐳𑐵𑑄 𑐣𑑄 𑐧𑑁𑐡𑑂𑐢𑐟 𑑘% 𑐥𑑂𑐬𑐟𑐶𑐱𑐟𑑄 𑐩𑐫𑐵 𑐢𑐵𑐂 𑑋 𑐗𑐷 𑐧𑑁𑐡𑑂𑐢𑐟 𑐠𑐹𑐐𑐸 𑐳𑐰𑐵𑐮𑐫𑑂 𑐧𑐵𑑃𑐮𑐵𑐎 𑐳𑐟𑑂𑐳𑐬𑑂𑐐 𑐩𑐡𑐸𑐐𑐸 𑐴𑐸𑐣𑐶𑑃 𑐠𑐸𑐎𑐠𑑄 𑐐𑐮𑐟 𑐟𑐠𑑂𑐫𑐵𑑄𑐎 𑐠𑐸𑐐𑐸𑐳𑐷 𑐥𑐶𑐡𑑄𑐐𑐸 𑐏𑐣𑐾𑐡𑐸𑑋

𑐗𑐷𑐐𑐸 𑐡𑐾𑐳𑐫𑐵𑐟 “𑐴𑐶𑐣𑑂𑐡𑐸” 𑐢𑐎𑐵 𑐢𑐵𑐫𑐾𑐐𑐸 𑐫𑐵𑐣𑐵𑐟𑑅𑐐𑐸𑐮𑐶𑑄 𑐖𑐣𑐐𑐞𑐣𑐵𑐫𑑂 𑐠𑑅𑐟 “𑐴𑐶𑐣𑑂𑐡𑐸” 𑐢𑐎𑐵 𑐔𑑂𑐰𑐎𑐹𑐥𑐶𑑄 𑐣𑑄 𑐁𑐥𑐵𑐮𑑄 𑐡𑐫𑐦𑐸 𑑋 𑐠𑐸𑐎𑐠𑑄 𑐫𑐵𑐫𑑂 𑐩𑐖𑑂𑐫𑐹𑐐𑐸 𑐏𑑅 𑑋 𑐧𑑁𑐡𑑂𑐢𑐟 𑐂𑐮𑐾𑐧𑐾𑐮𑐫𑑂 𑐩𑐸𑐣𑐵 𑐧𑑁𑐡𑑂𑐢 𑐟𑐫𑐐𑐸 𑐧𑐵𑐬𑐾 𑐳𑐴𑐮𑐴 𑐫𑐵𑐫𑐟 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐟 𑐐𑑂𑐰𑐳𑐵𑑅 𑐐𑑂𑐰𑐫𑐾𑐩𑐵𑐐𑐸 𑐡𑐸𑑋

𑐗𑐷 𑐧𑑁𑐡𑑂𑐢𑐟 𑐩𑐸𑐣𑐵 𑐗𑐷𑐐𑐸 𑐥𑑂𑐬𑐐𑐟𑐶, 𑐰𑐶𑐎𑐵𑐳 𑐰 𑐳𑑄𑐬𑐎𑑂𑐲𑐞𑐫𑐵 𑐮𑐵𑐐𑐷 𑐖𑑂𑐫𑐵 𑐰𑐿𑐐𑐸 𑐖𑑂𑐫𑐵𑐗𑑂𑐰𑑅𑐫𑐵𑐟 𑐥𑐬𑐶𑐩𑐵𑐬𑑂𑐖𑐣 𑐫𑐵𑐣𑐵 𑐫𑑄𑐎𑐾𑐩𑐵𑑅𑐐𑐸 𑐏𑐣𑐾𑐡𑐸𑑋 𑐧𑑁𑐡𑑂𑐢𑐟𑐾𑐐𑐸 𑐳𑐰𑐵𑐮𑐫𑑂 𑐠𑑅𑐩𑑂𑐴𑑄 𑐳𑑂𑐫𑐹𑐐𑐸 𑐏𑑃 𑑍 𑐠𑑅 𑐕𑐾𑑃𑐖𑑅 𑑍𑐖𑑅𑐏𑑅𑐥𑐶𑐣𑑂𑐟 𑐣𑑄 𑐎𑐣𑐾𑐐𑐸 𑐖𑑂𑐫𑐵 𑐫𑐵𑐫𑑂 𑐩𑐵𑑅𑐐𑐸 𑐏𑐣𑐾𑐡𑐸𑑋 𑐠𑐸𑐎𑐠𑑄 𑐩𑐫𑐵𑐐𑐸 𑐴𑐸𑐣𑐶𑑄 𑐫𑐵𑐣𑐵 𑐴𑐾 𑐠𑐸𑐐𑐸𑐳𑐷𑐫𑐵 𑐖𑐣𑐐𑐞𑐣𑐵𑐫𑑂 𑐧𑑁𑐡𑑂𑐢𑐟𑐾𑐐𑐸 𑐟𑐠𑑂𑐫𑐵𑑄𑐎𑐫𑐵 𑐮𑐶𑐔𑑂𑐰𑑅 𑐩𑑂𑐴𑑀 𑐥𑐶𑐡𑑄𑐐𑐸 𑐏𑐣𑐾𑐡𑐸𑑋 𑐁𑑅 𑐗𑐷 𑐣𑑂𑐴𑑂𑐫𑐮𑑄 𑐔𑐵𑐫𑐎𑐵 𑐳𑐬𑐎𑐵𑐬𑐫𑐵𑐟 𑐳𑐟𑐬𑑂𑐎 𑐫𑐵𑐫𑐐𑐸 𑐖𑑂𑐫𑐵 𑐫𑐵𑐣𑐵 𑐰𑐣𑐾𑐩𑐵𑑅𑐐𑐸 𑐡𑐸𑑋

(𑐣𑐾.𑐳. 𑑑𑑑𑑔𑑓.𑑘 (𑐟𑐕𑐮𑐵).𑑒𑑒 𑐳𑐣𑐶𑐰𑐵𑑅 (June 10, 2023) 𑐎𑐸𑐣𑑂𑐴𑐸 𑐫𑐾𑑃 𑐟𑑅𑐣𑐶𑐐𑑅𑐫𑐵 𑐩𑐏𑑃 𑐧𑐴𑐵𑑅𑐫𑐵 𑐬𑐟𑑂𑐣𑐎𑐷𑐬𑑂𑐟𑐶 𑐩𑐴𑐵𑐰𑐶𑐴𑐵𑐬𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐢𑐵𑐬𑑂𑐩𑐶𑐎 𑐥𑑂𑐬𑐰𑐔𑐣 𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐐𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫 𑐧𑐶𑐫𑐵𑐡𑐷𑐐𑐸 𑐣𑑂𑐰𑐔𑐹𑐫𑐵 𑐳𑐵𑐬𑐵𑑄𑐳𑑋 𑐰𑐫𑐎𑑅, 𑐰𑐿𑐬𑑀𑐔𑐣 𑐧𑑁𑐡𑑂𑐢 𑐟𑐶𑐬𑑂𑐠 𑐳𑑄𑐬𑐎𑑂𑐲𑐞 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐏𑑅𑑋 𑐣𑐵𑐥𑑃 𑐰𑐫𑐎𑑅 𑐢𑐬𑑂𑐩𑑀𑐡𑐫 𑐳𑐨𑐵𑐫𑐵 𑐩𑐹𑐕𑑂𑐫𑐵𑐘𑑂𑐖𑐾 𑐏𑑅𑐳𑐵, 𑐬𑐟𑑂𑐣𑐎𑐷𑐬𑑂𑐟𑐶 𑐩𑐴𑐵𑐰𑐶𑐴𑐵𑐬 𑐩𑐏𑑃 𑐧𑐴𑐵𑑅𑐫𑐵 𑐕𑑂𑐫𑐵𑑃𑐖𑐾𑐣𑑃 𑐏𑑅𑑋 𑐱𑑂𑐬𑑀𑐟 – 𑐳𑐸𑐐𑐟 𑐬𑐟𑑂𑐣 𑐳𑐶𑐣𑑂𑐡𑐸𑐬𑐵𑐎𑐵𑐬, “𑐳𑐩𑑂𑐫𑐎 𑐰𑐵𑑅𑐥𑑁” (𑐣𑐾.𑐳. 𑑑𑑑𑑔𑑓.𑑘 (𑐟𑐕𑐮𑐵).𑑒𑑓 𑐁𑐂𑐟𑐰𑐵𑑅 / June 11, 2023 – 𑐣𑐾𑐥𑐵𑐮𑐮𑐶𑐥𑐶 𑐀𑐣𑐮𑐵𑐂𑐣𑑂 𑐥𑑁 𑐩𑐸𑐣𑐵𑐎)