𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑐮𑐾𑐚𑐾 𑐣𑐾𑐥𑐵𑐮𑐨𑐵𑐳 𑐡𑐸𑐠𑑂𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐗𑐷𑐐𑐸 𑐠𑑅𑐐𑐸 𑐴𑐾 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐾𑐣𑐸!

𑐣𑐾.𑐳𑑄.𑑑𑑑𑑔𑑔.𑑕 (𑐔𑐶𑐮𑑂𑐮𑐵).𑑑𑑓 (𑐟𑑂𑐬𑐫𑑀𑐳𑐶)

𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑑂𑐮𑐾𑐚𑐾 𑐡𑐸𑐠𑑂𑐫𑐵𑐎𑐾𑐐𑐸 𑐣𑐾𑐥𑐵𑐮𑐨𑐵𑐳 𑐠𑑅𑐐𑐸𑐴𑐾 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐾𑐐𑐸 𑐄𑐟𑑂𑐟𑐩 𑐖𑐸𑐂𑑋 𑐀𑐠𑐾 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐾𑐐𑐸 𑐫𑐵𑐟 𑐢𑐵𑑅𑐳𑐵 𑐗𑐷𑐐𑐸 𑐣𑐾𑐥𑐵𑐮𑐨𑐵𑐳𑐫𑐵 𑐠𑑅𑐐𑐸𑐴𑐾 𑐣𑐾𑐥𑐵𑐮𑐮𑐶𑐥𑐶 𑐡𑐫𑐵𑐣𑑃 𑐮𑐶𑐥𑐶 𑐕𑐾𑐮𑐾 𑐩𑐦𑐫𑐵 𑐔𑑂𑐰𑑄𑐐𑐸 𑐧𑐵𑐢𑐵 𑐩𑐡𑐫𑐵 𑐰𑐣𑐷 𑑋 𑐳𑐟𑑂𑐟𑐶𑐐𑐸 𑐨𑐰𑐶𑐲𑑂𑐫𑐫𑑂 𑐴𑐾 𑐗𑐷𑐐𑐸 𑐣𑐾𑐥𑐵𑐮𑐨𑐵𑐳 𑐗𑐷𑐐𑐸 𑐴𑐾 𑐣𑐾𑐥𑐵𑐮𑐮𑐶𑐥𑐶𑑃 𑐕𑐸𑑃 𑐧𑐵𑐢𑐵 𑐩𑐡𑐾𑐎 𑐕𑐾𑐮𑐵 𑐫𑐣𑐾 𑐦𑐿 𑑋 𑐗𑐷 𑐨𑐰𑐶𑐲𑑂𑐫𑐫𑐵 𑐩𑐳𑑂𑐟𑐾𑐟 𑐠𑑅𑐐𑐸 𑐴𑐾 𑐣𑐾𑐥𑐵𑐮𑐨𑐵𑐳 𑐠𑑅𑐐𑐸 𑐴𑐾 𑐣𑐾𑐥𑐵𑐮𑐮𑐶𑐥𑐶 𑐕𑐾𑐮𑐾𑐐𑐸 𑐴𑑁𑐳𑐮𑐵 𑐧𑐶𑐫𑐾𑐐𑐸 𑐖𑐸𑐂 𑑋 𑐰 𑐖𑐎 𑐩𑐏𑐸𑐳𑐾 𑐴𑐮𑐶𑐩𑐫𑑂 𑐘𑑄𑐎𑐨𑐣𑑃 𑐗𑐷𑐐𑐸 𑐣𑐾𑐥𑐵𑐮𑐨𑐵𑐳 𑐣𑐾𑐥𑐵𑐮𑐮𑐶𑐥𑐶𑑃 𑐴𑐾 𑐕𑐾𑐮𑐾 𑐡𑐿𑐐𑐸 𑐳𑑁𑐨𑐵𑐐𑑂𑐫 𑐔𑐹𑐮𑐵𑐎𑐾𑐟 𑐟𑑅𑐖𑐶𑐐𑐸 𑐴𑐣𑐾𑐧𑐴𑐐𑐸 𑐖𑑂𑐫𑐵 𑐖𑐸𑐂 𑑋

𑐀𑐫𑐣𑑃 𑐠𑑁𑐎𑐣𑑂𑐴𑐫𑑂 𑐕𑐠𑑂𑐰𑑅 𑐣𑐾𑐥𑐵𑐮𑐨𑐵𑐳 𑐴𑑂𑐫𑐩𑐶𑐥𑐶𑐳𑑃 𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑐮𑐾𑐚𑐾 𑐣𑐾𑐥𑐵𑐮𑐨𑐵𑐳 𑐡𑐸𑐠𑑂𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐣𑐾𑐥𑐵𑐮𑐮𑐶𑐥𑐶 𑐩𑐏𑐸𑐳𑐾 𑐴𑐶𑐣𑑂𑐡𑐸𑐳𑑂𑐟𑐵𑐣𑐫𑐵 𑐡𑐾𑐰𑐣𑐵𑐐𑐬𑐮𑐶𑐥𑐶 𑐕𑐾𑐮𑐵 𑐀𑑅𑐏𑑅 𑐖𑑂𑐫𑐵 𑐫𑐵𑐣𑐵 𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰𑐫𑐾𑐎𑑅𑐥𑐶𑐳𑑃 𑐠𑑅 𑐣𑐾𑐥𑐵𑐮𑐮𑐶𑐥𑐶 𑐩𑐳𑑅 𑐢𑐎𑐵 𑑍 𑐣𑐾𑐥𑐵𑐮𑐮𑐶𑐥𑐶 𑐩𑐳𑑅𑐥𑐶𑑃 𑐫𑐎𑑂𑐰 𑐡𑐸 𑐢𑐎𑐵 𑐴𑐶𑐣𑑂𑐡𑐸𑐳𑑂𑐟𑐵𑐣𑐫𑐵 𑐡𑐾𑐰𑐣𑐵𑐐𑐬 𑐮𑐶𑐥𑐶 𑐴𑐾 𑐕𑐾𑐮𑐵 𑐖𑑂𑐫𑐵 𑐳𑐣𑐵 𑐔𑑂𑐰𑐣 𑑋 𑐠𑑂𑐰 𑐖𑑂𑐫𑐵𑑃𑐮𑐵 𑐣𑑂𑐴𑐵𑐥𑐵 𑐗𑐷 𑐕𑐠𑑂𑐰𑑅 𑐐𑐸𑐬𑐸𑐥𑐶𑐳𑑃 𑐫𑐵𑑅𑐐𑐸 𑐐𑐮𑑂𑐟𑐶𑐫𑐵𑐟 𑐡𑑀𑐴𑑀𑐬𑐾 𑐫𑐵𑐫𑐾𑐐𑐸 𑐖𑐸𑐂 𑑋 𑐄𑐧𑐮𑐾 𑐩𑐸𑐡𑑂𑐬𑐞 𑐥𑑂𑐬𑐾𑐳𑐫𑐵 𑐁𑐏𑑅 𑐰𑐶𑐎𑐵𑐳 𑐖𑐹𑐧𑐮𑐾 𑐣𑐾𑐥𑐵𑐮𑐮𑐶𑐥𑐶𑐫𑐵𑐟𑐣𑑃 𑐥𑑂𑐬𑐾𑐳𑐫𑐵 𑐁𑐏𑑅𑐎𑐠𑑃 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐎𑐸𑐟𑑅 𑐩𑐫𑐵𑐳𑐾 𑐀𑑅𑐥𑐸𑐎 𑐄𑐥𑐮𑐧𑑂𑐢 𑐖𑐹𑐐𑐸 𑐴𑐶𑐣𑑂𑐡𑐸𑐳𑑂𑐟𑐵𑐣𑐫𑐵 𑐡𑐾𑐰𑐣𑐵𑐐𑐬 𑐮𑐶𑐥𑐶 𑐕𑐾𑐮𑐵 𑐧𑐶𑐮 𑑋 𑐄𑐎𑐷𑐫𑐵 𑐮𑐶𑐔𑑂𑐰 𑐎𑐠𑑃 𑐣𑐾𑐥𑐵𑐮𑐨𑐵𑐳 𑐩𑐳𑑅𑐥𑐶𑐳𑑃 “𑐖𑐶𑐩𑐶 𑐩𑐵𑑃 𑐀𑐧𑐹𑑃 𑐴𑐾 𑐖𑐶𑐩𑐶𑐟 𑐣𑐾𑐥𑐵𑐮𑐨𑐵𑐳 𑐳𑑂𑐫𑐾𑐣𑐵 𑐩𑐟𑑅𑑋 𑐖𑐶𑐩𑐶𑐳𑑃 𑐐𑐠𑐾 𑐳𑐫𑐾𑐎𑐾 𑐦𑐿?” 𑐢𑐵𑐂𑐠𑐾𑑃 𑐖𑐶𑐩𑐶𑐟 𑐣𑐾𑐥𑐵𑐮𑐮𑐶𑐥𑐶 𑐴𑐾 𑐳𑑂𑐫𑐾𑐣𑐵 𑐧𑑂𑐫𑐹𑐥𑐶𑑃 𑐩𑐡𑐸 𑐖𑐶𑐩𑐶𑐳𑑃 𑐐𑐠𑐾 𑐳𑐫𑐾𑐎𑐾𑐐𑐸” 𑐢𑐫𑐵 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑐸𑐣𑐬𑑂𑐖𑐷𑐰𑐣𑐫𑐵 𑐖𑑂𑐫𑐵𑐫𑐵𑐟 𑐥𑐣𑐾𑐐𑐸 𑐖𑐸𑐮 𑑋 𑐩𑐾𑐠𑑂𑐰𑑅𑐳𑐶𑐣𑑃 𑐣𑐾𑐥𑐵𑐮𑐮𑐶𑐥𑐶𑐫𑐵 “𑐩𑑀𑐴” 𑐟𑑀𑐟𑐵 𑐡𑐾𑐰𑐣𑐵𑐐𑐬𑑃 𑐣𑐾𑐥𑐵𑐮𑐨𑐵𑐳 𑐕𑐾𑐮𑐾𑐣𑐸 𑐢𑐎𑐵 𑐀𑐨𑐶𑐫𑐵𑐣 𑐴𑐾 𑐣𑑂𑐴𑑂𑐫𑐵𑐎𑐮 𑑋 𑐄𑐎𑐷𑐫𑐵 𑐮𑐶𑐔𑑂𑐰𑐎𑐠𑑃 𑐠𑑁𑑃 𑐣𑐾𑐥𑐵𑐮𑐮𑐶𑐥𑐶 𑐩𑐳𑑅𑐥𑐶𑑃 𑐴𑐾 𑐣𑐾𑐥𑐵𑐮𑐨𑐵𑐳𑐫𑐵 𑐴𑑂𑐫𑐩𑐶𑐟 𑐖𑐸𑐫𑐵 𑐰𑐮 𑑋 𑐀𑐫𑐣𑑃 𑑍 𑐣𑐾𑐥𑐵𑐮𑐮𑐶𑐥𑐶𑐫𑐵 𑐩𑐹𑐠𑐹𑐥𑐶𑑃 𑐱𑑄𑐎𑐬𑐩𑐵𑐣 𑐬𑐵𑐖𑐰𑑄𑐱𑐷 𑑍 𑐴𑐾𑐩𑐬𑐵𑐖 𑐱𑐵𑐎𑑂𑐫 𑑍 𑐥𑐸𑐲𑑂𑐥𑐬𑐟𑑂𑐣 ‘𑐳𑐵𑐐𑐬’ 𑑍 𑐥𑐹𑐬𑑂𑐞𑐴𑐬𑑂𑐲 𑐰𑐖𑑂𑐬𑐵𑐔𑐵𑐬𑑂𑐫 𑑍 𑐎𑐵𑐱𑐶𑐣𑐵𑐠 𑐟𑐩𑑀𑐟 𑐠𑐾𑑃 𑐖𑐵𑐥𑐶𑑃 𑐐𑐸𑐬𑐸𑐥𑐶𑑃 𑑍 𑐬𑐵𑐖𑐵 𑐱𑐵𑐎𑑂𑐫 𑑍 𑐰𑐶𑐎𑐵𑐳𑐩𑐵𑐣 𑐳𑑂𑐫𑐳𑑂𑐫𑑅 𑑍 𑐱𑐬𑐡 𑐎𑐳𑐵 ‘𑐎𑐳𑐵𑐕𑐾𑑃” 𑐠𑐾𑑃 𑐖𑐵𑐥𑐶𑑃 𑐣𑑂𑐴𑐫𑐮𑐸𑐰𑐵𑐥𑐶𑐳𑑃 𑐣𑐾𑐥𑐵𑐮𑐮𑐶𑐥𑐶𑐫𑐵 𑐩𑐹 𑐠𑐸𑐂𑐎𑐾𑐐𑐸 𑐖𑑂𑐫𑐵 𑐖𑐸𑐮𑐳𑐵 𑑍 𑐎𑐩𑐮𑐬𑐟𑑂𑐣 𑐟𑐸𑐮𑐵𑐢𑐬𑑃 𑐡𑐎𑐮𑐾 𑐣𑑂𑐴𑐵𑐥𑐵𑑃 𑐎𑐩𑑂𑐥𑐫𑐹𑐚𑐬𑐾 𑐣𑐾𑐥𑐵𑐮𑐮𑐶𑐥𑐶 𑐡𑐫𑐾𑐎𑐾𑐐𑐸 𑐖𑑂𑐫𑐵𑐫𑐵 𑐣𑑂𑐴𑑂𑐫𑐮𑐸𑐰𑐵 𑐖𑐸𑐫𑐵 𑐡𑐶𑐮 𑑋 𑐰𑐫𑐎𑑅𑐥𑐶𑐣𑐶𑐐𑐸 𑐴𑑅𑐥𑐵𑐮𑑃 𑐗𑐷𑐳𑑃 𑐣𑐾.𑐳𑑄.𑑑𑑑𑑒𑑙 𑐣𑐶𑐳𑐾𑑃 𑐴𑐮𑐶𑐩𑐫𑑂 𑐡𑐎𑐮𑐾 𑐣𑑂𑐴𑐵𑐥𑐵𑑃𑐐𑐸 𑐣𑐾𑐥𑐵𑐮𑐮𑐶𑐥𑐶 𑐀𑐣𑐮𑐵𑐂𑐣 𑐥𑐮𑐶𑐳𑑂𑐠𑐵 𑐫𑐵𑐣𑐵 𑐣𑐾𑐥𑐵𑐮𑐮𑐶𑐥𑐶 𑐳𑑂𑐫𑐾𑐣𑐵 𑑍 𑐣𑐾𑐥𑐵𑐮𑐮𑐶𑐥𑐶𑑃 𑐀𑐣𑐮𑐵𑐂𑐣 𑐥𑑂𑐬𑐎𑐵𑐳𑐣 𑐫𑐵𑐣𑐵 𑐰𑐫𑐵𑐐𑐸 𑐖𑐸𑐮𑑋 𑐰 𑐖𑐎 𑐩𑐏𑐸𑐳𑐾 𑐫𑐸𑐣𑐶𑐎𑑀𑐜𑐫𑑂 𑐣𑐾𑐥𑐵𑐮𑐮𑐶𑐥𑐶 𑐡𑐸𑐠𑑂𑐫𑐵𑐎𑐾𑐐𑐸 𑐖𑑂𑐫𑐵𑐣𑑃 𑐳𑐸𑐠𑐵𑑃 𑐮𑐵𑐎𑐾 𑐦𑐟 𑑋 𑐀𑐫𑐣𑑃 𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑑂𑐮𑐾𑐚𑐾 𑐣𑐾𑐥𑐵𑐮𑐨𑐵𑐳 𑐡𑐸𑐠𑑂𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐠𑐸𑐖𑑀𑐐𑐸 𑐀𑐣𑐸𑐨𑐰 𑐡𑐸𑐥𑐶𑑄𑐎𑐾 𑐕𑐹𑑃 𑐴𑐾 𑐳𑐮𑑂𑐮𑐵 𑐩𑐫𑐵𑐳𑐾 𑐩𑐳𑑅𑐩𑐳𑑅 𑐖𑑂𑐫𑐵 𑐳𑐣𑐾𑐐𑐸 𑐖𑑂𑐫𑐵 𑐳𑐸𑐬𑐸 𑐖𑐸𑐐𑐸 𑐕𑐐𑐸 𑐀𑐨𑐵𑐐𑑂𑐫𑐫𑐵 𑐏𑑃 𑐖𑐸𑐫𑐵 𑐧𑐶𑐮 𑑋 𑐠𑐸𑐎𑐷𑐫𑐵 𑐧𑐵𑐬𑐾 𑐴𑐮𑐶𑑃 𑐣𑐾𑐰𑐵𑑅 𑐡𑐧𑐹𑐫𑐵 𑐢𑑂𑐫𑐵𑐣 𑐳𑐵𑐮𑐾𑐐𑐸 𑐎𑐸𑐟𑑅 𑐁𑐟𑐎𑑂𑐎 𑐧𑑂𑐫𑐬𑑂𑐠 𑐖𑐸𑐫𑐵 𑐧𑐶𑐮 𑑋 𑐩𑑂𑐴𑑀 𑐖𑐹𑐳𑐵𑑃 𑑍 𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑐮𑐾𑐚𑐾 𑐣𑐾𑐥𑐵𑐮𑐨𑐵𑐳 𑐡𑐸𑐠𑑂𑐫𑐵𑐎𑐾𑐟 𑐡𑐾𑐰𑐣𑐵𑐐𑐬𑐮𑐶𑐥𑐶 𑐕𑐾𑐮𑐵 𑐖𑑂𑐫𑐵𑐳𑐣𑐵 𑐡𑐷𑐥𑐶𑐳𑑃 𑐠𑑅 𑐣𑐾𑐥𑐵𑐮𑐮𑐶𑐥𑐶 𑐩𑐳𑑅𑐳𑐵 𑐳𑑂𑐫𑐾𑐣𑐵 𑐳𑐫𑐾𑐎𑐵 𑐰𑐵 𑑍 𑐳𑑅𑐥𑐶𑐣𑑂𑐟 𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑐮𑐾𑐚𑐾 𑐖𑑂𑐫𑐵𑐳𑐣𑐾𑐐𑐸 𑐖𑑂𑐫𑐵 𑐨𑐵𑐮𑐵 𑐧𑐶𑐫𑐵𑐡𑐶𑐮 𑐢𑐵𑑅𑐳𑐵 𑐳𑑅𑐥𑐶𑐳𑑃 𑐧𑐵𑑃𑐮𑐵𑐎 𑐫𑐵𑐂𑐐𑐸 𑐏𑑃 𑐴𑐵𑐣𑑃 𑐮𑐶𑐳𑐵𑐎𑐫𑐵 𑐮𑐸𑐩𑑄𑐎𑐵 𑐔𑑂𑐰𑐣𑐵 𑑋

𑐀𑐠𑐾 𑐩𑐖𑐸𑐮 𑐢𑐵𑑅𑐳𑐵 𑑍 𑐥𑐺𑐠𑑂𑐰𑐷𑐣𑐵𑐬𑐵𑐫𑐞𑑃 𑐣𑐾𑐥𑐵𑐮𑐩𑐞𑑂𑐜𑐮 𑐮𑐵𑐎𑐵𑑅 𑐎𑐵𑑅 𑐰𑑅𑐧𑐮𑐾 𑐕𑐠𑑂𑐰𑑅 “𑐥𑑂𑐬𑐢𑐵𑐣” 𑐟𑐾𑐳𑑃 𑐥𑐺𑐠𑑂𑐰𑐷 𑐣𑐵𑐬𑐵𑐫𑐞𑐫𑐵 𑐥𑑃 𑐮𑐶𑐣𑐵 𑐩𑐮𑑂𑐮 𑐖𑐸𑐖𑐸𑐥𑐶𑐣𑐶𑐐𑐸 𑐳𑑄𑐴𑐵𑐬 𑐫𑐵𑐫𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑑅 𑐠𑐾𑑃 𑑍 𑐣𑐾𑐥𑐵𑑅𑐩𑐶𑐟𑐾𑐳𑑃 𑐧𑐮𑑂𑐮 𑐡𑐫𑐾𑐎𑐹𑐐𑐸 𑐣𑐾𑐥𑐵𑑅 𑐬𑐵𑐲𑑂𑐚𑑂𑐬𑐷𑐫 𑐥𑐵𑐬𑑂𑐚𑐶𑐫𑐵 𑐰𑐶𑐣𑐵𑐳 𑐕𑐩𑑂𑐴 “𑐬𑐵𑐖𑐰𑑄𑐱𑐷” 𑐣𑐵𑐫𑑅𑐣𑑃 𑐫𑐵 𑐠𑐾𑑃 𑑍 𑐠𑑁𑑃 𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑐮𑐾𑐚𑐾 𑐣𑐾𑐥𑐵𑐮𑐨𑐵𑐳 𑐣𑐾𑐥𑐵𑐮𑐮𑐶𑐥𑐶𑑃 𑐡𑐸𑐠𑑂𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐥𑑄𑐐𑑅 𑐫𑐵𑐣𑐵 𑐣𑐾𑐥𑐵𑐮𑐨𑐵𑐳𑐫𑐵 𑐰𑐶𑐎𑐵𑐳 𑐰 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵𑐫𑐵𑐟 𑐥𑐣𑐾𑐐𑐸 𑐂𑐟𑐶𑐴𑐵𑐳 𑐡𑐫𑐾𑐎𑐾𑐐𑐸 𑐖𑐎 𑐖𑐸𑐂 𑑋 𑐠𑐸𑐖𑑀𑐐𑐸 𑐀𑑅𑐏𑑅𑐐𑐸 𑐖𑑂𑐫𑐵 𑐣𑐾𑐥𑐵𑐮𑐨𑐵𑐳 𑐰 𑐣𑐾𑐥𑐵𑐮𑐨𑐵𑐳𑐎 𑐟𑐫𑐾𑐟 𑐫𑐵𑐫𑐾𑐐𑐸 𑐕𑐐𑐸 𑐟𑑅𑐢𑑄𑐐𑐸 𑐴𑐾 𑐥𑐵𑐥 𑐖𑐸𑐂𑐦𑐸 𑑋 𑐄𑐎𑐾𑑃 𑐠𑐸𑐖𑑀𑐐𑐸 𑐥𑐵𑐥 𑐩𑐫𑐵𑐫𑐾𑐟 𑐐𑐹𑐐𑐮𑑂 𑐚𑑂𑐬𑐵𑐣𑑂𑐳𑐮𑐾𑐚𑐾 𑐣𑐾𑐥𑐵𑐮𑐨𑐵𑐳 𑐡𑐸𑐠𑑂𑐫𑐵𑐎𑐾𑐟 𑐀𑑅𑐏𑑅 𑐖𑑂𑐫𑐵𑐳𑐣𑐵𑐔𑑂𑐰𑑃𑐥𑐶𑑃 𑐥𑐵𑐳𑐵𑐥𑐶𑐣𑑂𑐟 𑐡𑐸𑐣𑐸𑐐𑐮𑑃 𑐣𑐶𑐳𑐾𑑃 𑐂𑐣𑐵𑐥 𑐫𑐵𑐣𑐵 𑐔𑑂𑐰𑐣𑐵𑑋

– 𑐜𑐵. 𑐳𑐸𑐰𑐣𑑂 𑐰𑐖𑑂𑐬𑐵𑐔𑐵𑐬𑑂𑐫
(𑐴𑐮𑐶𑐩𑐫𑑂 𑐡𑐎𑐮𑐾 𑐣𑑂𑐴𑐵𑐥𑐵𑑃𑐐𑐸 𑐣𑐾𑐥𑐵𑐮𑐮𑐶𑐥𑐶 𑐰𑐾𑐧𑑂 𑐳𑐵𑐂𑐚𑑂 𑐳𑑄𑐳𑑂𑐠𑐵𑐥𑐎)
www.nepal-lipi.com
𑐗𑐷𑐐𑐸 𑐣𑐾𑐥𑐵𑐮𑐨𑐵𑐳 𑐣𑐾𑐥𑐵𑐮𑐮𑐶𑐥𑐶𑑃 𑐴𑐾 𑐕𑐾𑐮𑐾𑐣𑐸 𑐀𑐨𑐶𑐫𑐵𑐣 𑐎𑐬𑑂𑐟𑐵
𑐣𑐾.𑐳𑑄.𑑑𑑑𑑔𑑔.𑑕(𑐔𑐶𑐮𑑂𑐮𑐵).𑑑𑑓(𑐟𑑂𑐬𑐫𑑀𑐳𑐶)