Newah Lawmaker: Dr. Harsha Sakya to represent NRP?

Leave a Comment / NEWS (बुखँ) / By Suwarn Vajracharya / April 24, 2008 April 24, 2008

नेवाः संसद – डा हर्ष रत्न शाक्य नेरापाया प्रतिनिधि जुइगु?

थनी निवाः न्ह्यवः (अप्रिल १०) कुन्हु जूगु संविधान सभाया निर्वाचनया लिच्वःय् समानुतातिक कथँ कुर्कूगु मत ल्याखायगु ज्या बल्ल म्हिगः क्वचाल। लिच्वःकथँ प्रत्यक्ष मतदाने त्यागु सीटया अलावा नेकपा माओवादिया १००म्ह (प्रत्यक्षे त्याःपिँ १२०म्हँ याना जम्मा २२०म्ह) , नेपाली कांग्रेस ७० म्ह (प्रत्यक्षे त्याःपिँ ३७म्हँयाना सालाखाला १०७म्ह), नेकपा एमालेनं ६५ निसेँ म्ह, (प्रत्यक्षे त्याःपिँ ३३ म्हँ याना सालाखाला ९८म्ह) , मधेसी जनाधिकार फोरमया २२म्ह (प्रत्यक्षे त्याःपिँ ३०म्हँ याना जम्मा ५२म्ह), मधेस लोकतान्त्रिक पार्टिँ ११म्ह (प्रत्यक्षे त्याःपिँ ९म्हँ याना जम्मा २०म्ह), संसदत बढेजुइगु सीःदये धुंकूगु थासे झी नेपाः राष्ट्रीय पार्टिँ बल्ल छगु जक सीट त्याका कायफत। थ्व खँ न्यनाँ, ख्वयेगु न्हिलेगु छिकपिनिगु जिम्माय्।

आ झीसँ बिचाःयायमागु छुधका धाःसा, सुयातः नेरापाया प्रतिनिधि यायेमाली धैगु खँ, गुगु खँ आतकँ स्पस्ट मजूनि। झी दनेवाःनँ न्ह्यथनागु थ्व विषययात प्रतिकृया यानादीपिँ पासापिसँ, नेवाःतेगु छगुहे जक पार्टिया छम्हहे जक प्रतिनिधिला भाराभुरुम्ह मज्यू धका, थःगु बिचा प्वन्का हये धुंकल (वयकःपिनिगु बिचाः स्वयतः, थ्वयाँ न्हापायागु पोष्टिङ स्वया दिसँ)। थ्वहे इलय् नेरापाया ७२म्ह उम्मेदवारते दथुई छम्ह दुजः, डा हर्ष रत्न शाक्यँ, समानुपातिक मतया आधारे थःम्हँ नेवाः समाज, भास व संस्कृति या उत्थान व संरक्षण यायगुलागी संविधान सभाय् झीगु सः थ्यंकेफु धका प्रतिज्ञा बियादीगु दु। थःगु ज्ञाण, सिप व अनुभव झी सकसिगु ध्यानाकर्षण यायतः झीतः छोयाहःगु ईमेःले, वयकःया संक्षिप्त परिचय (बयोडेःटा) नापँ दुथ्याका हैदिल। अंग्रेजीँ च्वयातःगु थ्व संक्षिप्त परिचययात हानँ संक्षिप्त याना ब्वने अपुइकः न्ह्यथना च्वना। (अले झी The Newahया माएन् पावर मगाःनिगुलिँ, थन छोयाहैदीगु खँ, फयाँफछि नेपाल भासँ च्वया हैदिल धाःसा तःधंगु गुहालि जुइ।)
सेवन् सीस् फर्मा समूहया अध्यक्षकथँ झीगु समाजय् म्हस्यूम्ह डा हर्ष रत्न शाक्य भाजु, नेपाःया समाज, बौद्ध धर्म, भास, संस्कृति व शिक्षाया ख्येले तःधंगु सेवायाना दिवंगत जुयादी धुंकूम्ह झी आशा राम शाक्य प्राध्यापकजु व माँ गुणलक्ष्मिया काय् खः। कृषि विज्ञान विश्व विद्यालयँ, पशु उपचार विज्ञान शास्त्र ब्वनादिसे, तरहराया कृषि अन्वेषण केन्द्रँ निसेँकया, एसियन् डिवलप्मेन्ट बैन्कया एक्वा प्रोजेक्ट् इत्यादी तकँ ज्यायानादिसे, नेपाल संवत थ्वहे ११२८ (सन् २००८) सालँनिसेँ, सेवन् सीस् फर्मा प्रा लि, एम् डी वेट्लिन्क्, मिडिया मिडिया, एन् एन् हाएचरि, फ्यूचः मेडिक्विप् प्रा लि दुथ्याःगु सेवन् सीस् व्यापार समूहया अध्यक्ष जुया दिल।

नेपाल संवत ११२७ (सन् २००७) सालँ निसेँ नेपाल वेटेरिनरि औषधि आयात संघया अध्यक्ष जुयादीम्ह झी डा हर्ष रत्न शाक्य भाजु, नेपाल वेटेरिनरि संघ, युवक बौद्ध परिषद, रोटरि क्लब् थेँ जाःगु सामाजिक सेवा ख्यलेनँ योगदान याना च्वंगु दु। राष्ट्रीय रत्न पुरस्कार, भारत एक्सिलेन्स् , अमेरिकाया पाखेँ “Great Minds of 21st Century” इत्यादिँ पुरस्कृत जुया दीम्ह डा हर्ष रत्न शाक्य भाजुया परिचय, एसिया पाशिफिक् क्षेत्रया WHO’s WHO डिरेक्टरिहे दुथ्याना च्वंगु दु।

थ्व खः झी डा हर्ष रत्न शाक्य भाजुया परिचय। आ बिचाःयानादिसँ वयकःयात झीगु नेपाः राष्ट्रीय पार्टिया प्रतिनिधि याना संविधान सभाय् छोय् बहम्हथेँ च्वँलाकि मच्वँ? छिगु बिचाः प्वन्काहै दिसँ।छिगु कमेन्ट् छकः जक च्वयादीसा गाः।प्रकाशन् जुइतः छूँ भचा समय कायेफु।

0 thoughts on “Newah Lawmaker: Dr. Harsha Sakya to represent NRP?”

रोशन तिका:, थिमि
April 24, 2008 at 19:45

डा शाक्यया उत्साहयात कदर याना, तर जिगु बिचाःलय् (तप्यंक धायेबलय्) वयक: नेरापा या सहि प्रतिनिधि जुइ मल्व: । वयक:या बायोडाटा ब्वनाबलय वयक: थ:गु ब्यबसाय व पेशाय् दख्खल दु धैगु सी दत, तर झी नेवा:तयेगु मू समस्याय् वयक:याके गुलि दुग्यंक ज्ञां दु अले खँय बर्म्हुतयेगु दथुइ च्वना नेवा: भाय् संस्कृति तजिलजिया नितिं संघर्ष यायेगु क्षमता गुलि दु धैगु सी मदु।वयकलं बायोडाटा हे अंग्रेजि भासं बियादिल धैगु न्यनां जि ला वाच्च हे जुल।

जिगु बिचाःलय् नेरापाया न्हापांगु प्राथमिकता कृषि वा पशु बिज्ञान मखु, उकें नेवा: जातिया स्वार्थया नितिं लगेजुया च्वनादिम्ह मनू मा: । डाक्टर शाक्यया ब्यावसायिक संलग्नतानं यक्व हे दु खनिसा, उकें याना वयकलं संविधान दयेकेगु इलय न्ही न्ही संसदय च्वना गाक्क ई बिया ल्वाना दी फैमखुला धैगु शंकानं दु। वयक: सिवे बरु नेपालभास पत्रिका वा साहित्य संस्कृतिइ लगेजुया च्वनादीपिँ मनू मा:, गुम्हेसिनं ६०० म्ह गैर नेवा: भावना दुपिँ (सांसदत) नं थ:गु बिचाःलय् सहमत याकेफै ।

जिं थ:गु मनय च्वंगु खँ तप्यंक धया, थुकियात अ:खतं कया दी मते।डाक्टर शाक्यनाप जिउ ब्यक्तिगत परीचय मदुलिं नं जित: भ्रम जूगु जुइफु ।
-रोशन तिकाः, थिमि

Reply
darasha
April 24, 2008 at 21:26

वयकःयात (संविधान सभाय्) छोयेगु कूछी धुंकूगु खःसाँ जि आसाकुति जुया हानं च्वया च्वनाँ छु फाइदा।अयनं वयकः नवाय् फुम्ह खःसा बाँलाः।अले जिँ वयकःया पौ छपु ब्वनागु दु चुनाव न्ह्यवः उलिहे जक। नेरापाया दुजः जुइवँतुँ नेवाः सरोकारदुम्ह जुइमखु। जि दुजः मखुसाँ, जिगु संघर्ष थउँतक्क मदीनि नेवाः जागरण म्वायेकेतः। उकेँ गैर नेवाः भावना पोख्त जुइधुंकूपिँ छोयाँ छुयाय्। नेवाः व नेपाःया सम्बन्ध बिच्छेद यायेतः स्वःपिँ नाप प्रतिकृया याय् फुम्हँ माः। थ्व गुण डा हर्ष रत्न शाक्य याके दुसा ज्यू। अबुया नाँ घाना भविष्य स्यंकेगु मखु सकल नेवाःतेगु।
– darasha

Reply
Pushpa Ratna Tuladhar
April 24, 2008 at 21:58

भाजु डा हर्ष रत्न शाक्य नेपाः राष्ट्रीय पार्टिया समानुपातिक उम्मेदवारया धलखय् दुथ्याना च्वंगु हे मदुसा वयेक: गुकथं नेपाः राष्ट्रीय पार्टिया समानुपातिक उम्मेदवारपाखें सांसद जुये फइ? नेपाः राष्ट्रीय पार्टिं थ:गु समानुपातिक उम्मेदवारया धल:कथं जातीय स्वशासन निंति व नेपालभास व संस्कृतिया थपू यायेत थःत पाना च्वंम्ह भाजु बुद्ध रत्न मानंधर (बुद्ध सायमि) , (किमखुसा) मिसापिँ पाखें जूसा मंगला कारंजीतयात सांसद दयेकेमा:।
– पुष्प रत्न तुलाधर
* * * * *
डा हर्ष रत्न शाक्यया नाँ नेपाः राष्ट्रीय पार्टिया समानुपातिक उम्मेदवारया धलखय् नं ६४ सँ दुथ्याना च्वंगु दु। अप्रिल् २१ तारिक् या पोस्टिङ स्वयादिसँ।
– झी The Newah

Reply
मुक्त नेपाल
April 26, 2008 at 07:42

नेपाः राष्ट्रीय पार्टिया समानुपातिक उम्मेदवार मध्ये गुलिखे छखा हे छें, छगू हे परिवारया दुजः दुथ्यानाच्वंगु खने दु । थ्व पार्टि शुरु निसें हे परिवारवादं मुक्त जुइ माल । संविधान सभाय् थ्व पार्टिया प्रतिनिधि सुं नाँजाम्ह भन्ते, बर्मु, कवि, व्यापारी, समाजसेवी, साहित्यकार, भजन खलःया दुजः, एनजिओया हाकिम वा कर्मचारी, आजन्म पद मत्वतीम्ह पदाधिकारी मखु, छम्ह जुझारु राजनेता वा राजनीतिक कार्यकर्ता जुइ मालः ।

जिगु नजर मनोज कुमार खड्गी पाखे लानाच्वंगु दु । मनोज खड्गीयात जिं व्यक्तिगत रुपं म्हमस्यू, ख्वाःतकं मखंनि । अयनं नेवाः उत्थानया लागि वयकःया जुझारु व सकृय योगदान न्यना वया च्वनागु दु । वयकः नेवाः समाज दुनेया उत्पीडित अल्पसंख्यक पुचःया छम्ह ल्यायम्ह दुजःनं खः । राजनीतिं विमुख जुया वना च्वंपिं नेवाः युवातयतः राजनीति पाखे आकषिर्त व नेतृत्व याये निम्ति जिं मनोज खड्गीयात भोट् याना ।
– मुक्त नेपाल

Reply
सुरेश भक्त
April 26, 2008 at 21:11

परिवारबाद नेवाः पार्टी दुने द्वाँवल धायेगु खँ गम्भीर खँ ख:। नेवाः पार्टीया अध्यक्ष व अन्यया छु बिचार दु, धयादिसँ। नातावाद , कृपावाद व परिवारबाद यायेगु ख: सा,थ्व पार्टीया भविष्य मरु न्हाँ।

सुरेश भक्त

Reply
Niranjan Malakar
April 27, 2008 at 01:53

I think there is no other alternative than choosing Dr. Harsha Sakya, who is chairman of the party. If he wants. If he doesn’t want, we have to choose.
Good Luck.
Rgds
Niran

Reply
सुरेश भक्त
April 28, 2008 at 06:46

मयजु ख: की भाजु ख: सीके मफुत। मुक्त नेपालजूँनँ (थःगु) परिचय बिया कमेन्ट यानादीसा बाँलाइथेँ च्वँ।
– सुरेश भक्त

Reply
yalami
April 29, 2008 at 11:04

जितः लिपा जूसाँ छु धाय् मास्ते वः धाःसा समानुपातिके मनोनितजूम्ह डा हर्ष रत्न शाक्य छूँहे हालतेनं विधायक जुइतः मल्वः। छाय् धाःसा वयेकः छम्ह व्यापारी उद्योगपति जक जुल। अले विधायक जयेतः माःगु योग्यता थ्व मखु। अले थःगु (छेँया) भोट् हे पार्टियातः मब्यूम्हेसितः छुकिया आधारे मनोनित यात?
– यलमि

Reply
nabin shakya
April 29, 2008 at 11:13

समानुपातिके डा हर्ष रत्न शाक्ययातः छुकिया आधारे ल्यल, व खँ क्लियर मजू। वयकः छम्ह व्यापारी जुल। संसदे वयकःयात छु व्यापार याकेतः छोयेगुल? थःगु छेँ (छ्वँपिन्तः) हे कन्विन्स् यायमफुम्हँ संसदे झी नेवाःतेःगु सः तये फइ धैगु जितःला विश्वास मदु।
– नविन शाक्य

Reply
biraj
April 29, 2008 at 16:05

संविधान सभाय् नेपाः राष्ट्रीय पार्टिया प्रतिनिधि याके नेवाः जूगु या योग्यताँ जक मगाः। पोलिटिकल् नोलेज् नापँ खयेत लिसे नेवाः अधिकारया नितिँ ल्वायेगु कपेसिटी नं दयेमाः। अथे जूगुलिं डा हर्ष भाजु भचा पायछिम्ह क्यान्डिडेट् मखुथेँ च्वँ। (वयकःया पलेसा) सुरेश प्रधान् भाजु गथे च्वँ, (लायेकम्हथेँ मच्वँला) ?
– बिराज्

Reply
Suresh (सुरेश)
April 30, 2008 at 08:04

नेपा: राष्ट्रीय पार्टिपाखें समानुपातिक उम्मेदवार कथं प्रतिनिधित्व याइम्ह व्यक्तित्वया वारे The Newah ब्लगे हलिमया थीथी थासय् च्वंपिं नेवा: पासापिनिगु सहलह ब्यानाच्वंगु ब्वनेदया लसता प्वंकाच्वना । उकीसं जिगु नाँयात कयानं उतिकं हे सहलह ब्याकादीगुलिं सकल पासापिंत यक्को यक्को सुभाय् द्यछायाच्वना । खःतु नेपा: राष्ट्रीय पार्टिपाखें प्रतिनिधित्व याकेफइपिं धका ७२ म्ह उम्मेदवार पिनिगु नाँ निर्वाचन आयोगय् छ्वःगु खः, वयेकःपिं सकलें सक्षम व सवलपिं हे खः थुकी छुँ हे कथँया द्विविधा मदु, अथे खयानं नेपा: राष्ट्रीय पार्टियात वःगु मत (भोट) या आधारं छम्हेसितःजक प्रतिनिधित्व याकेफइगु परिस्थितिया हुनिं नेपा: राष्ट्रीय पार्टिया केन्द्रीय समितिया मूज्याय् बृह्त्तर सहलह ब्याकालि थीथी कथँया मापदण्डया आधारकया नेपालभास ख्यःया नाँजा:म्ह कवि नापँ योद्धा भाजु बुद्ध सायमि (बुद्धरत्न मानन्धर) यात मनोनयन या:गु दु । ग्वाहालिया निंतिं http://www.nepalnews.com.np/contents/2008/newaridaily/sandhyatimes/apr/apr28/bibid.php लिंकय् सन्ध्या टाईम्स् न्हिपौया बुखं स्वयादीत इनाप यानाच्वना ।
– सुरेश

Reply

0 thoughts on “Newah Lawmaker: Dr. Harsha Sakya to represent NRP?”

Leave a Comment Cancel Reply